लोकसभा निवडणुकीत आणि आता विधानसभा निवडणुकीतही भाजपच्या सर्वच नेत्यांनी उद्धव ठाकरेंना टार्गेट केलंय. अगदी मोदी, अमित शाहांच्या भाषणातही ठाकरेंवर सातत्यानं हल्लाबोल होतोय. ठाकरेही प्रत्येक सभेत भाजपला शिंगावर घेतायेत. अशा राजकीय संघर्षात उद्धव ठाकरेंची एक साद सगळ्यांनाच बुचकाळ्यात पाडतेय.

शिवसेनेच्या बंडात शिंदेंना साथ देणाऱ्या सगळ्या उमेदवारांविरोधात उद्धव ठाकरे कमालीचे आक्रमक झालेत. यासाठी त्यांनी थेट भाजपसोबत युतीचा हात पुढे केलाय. संभाजीनगर जिल्ह्यातील सिल्लोड मतदारसंघात शिंदे गटाचे मंत्री आणि उमेदवार अब्दूल सत्तार यांना पाडण्यासाठी उद्धव ठाकरेंनी चक्क भाजपला साद घातलीय. सिल्लोडला लागलेला कलंक दूर करूयात असा निर्धार ठाकरेंनी केलाय. तर सत्तारांनीही त्यांना प्रत्युत्तर दिलंय.

विशेष म्हणजे उद्धव ठाकरेंच्या सिल्लोडच्या सभेत भाजपचे काही पदाधिकारीही स्टेजवर उपस्थित होते. भाजपच्या स्थानिक कार्यकर्त्यांनी थेट उद्धव ठाकरेंच्या उमेदवाराचा प्रचार सुरू केलाय.

भाजपचे माजी केंद्रीय मंत्री आणि भाजपच्या विधानसभा निवडणूक व्यवस्थापन समितीच्या अध्यक्ष रावसाहेब दानवेंनी तर सत्तारांमुळे सिल्लोड तालुका पाकिस्तान बनला, अशा शब्दात घणाघाती टीका केली होती. या पाश्वभूमिवर ठाकरेंनी भाजपला हाक दिलीय. भाजप आता याला प्रतिसाद देणार की सत्तार आपला बालेकिल्ला शाबूत ठेवणार हे निकालानंतरच स्पष्ट होईल. मात्र यामुळे सत्तारांची डोकेदुखी वाढलीय एवढं नक्की.