Election Code Of Conduct : राज्यात सध्या आदर्श आचारसंहिता सुरु आहे. त्यामुळे राज्यात ठिकठिकाणी पोलिसांचा फौजफाटा तैणात आहे, जागोजागी नाकाबंदी करण्यात आलेली आहे. आचारसंहिता लागल्यापासून दहा दिवसांत राज्यात तब्बल १०० कोटींची मालमत्ता जप्त करण्यात आली आहे. पुणे, हिंगोली, छत्रपती संभाजीनगरसह राज्यात पोलिसांनी विशेष कारवाई करत १०० कोटी ४० लाख रुपयांची मालमत्ता जप्त केली आहे.

१०० कोटी ४० लाख रुपयांची मालमत्ता जप्त

राज्य शासनाच्या व केंद्र शासनाच्या विविध अंमलबजावणी यंत्रणांद्वारे करण्यात आलेल्या कारवाईत बेकायदा पैसे, दारू, ड्रग्ज व मौल्यवान धातू इत्यादी बाबतीत एकूण १०० कोटी ४० लाख रुपयांची मालमत्ता जप्त करण्यात आली आहे. आचारसंहितेची राज्यात प्रभावी अंमलबजावणी सुरु असल्याचेही मुख्य निवडणूक अधिकारी कार्यालयाने सांगितले.

१२५० तक्रारी निकाली काढल्या -

सी-व्हिजिल ॲपवरील आचारसंहिता भंगाच्या १२५० तक्रारी निकाली लावण्यात आल्या आहेत. राज्यात आतापर्यंत १०० कोटी ४० लाख रुपयांची मालमत्ता जप्त करण्यात आली आहे. विधानसभा सार्वत्रिक निवडणुकीसाठी १५ ऑक्टोबरपासून आदर्श आचारसंहिता लागू झाली आहे. १५ ते २५ ऑक्टोबरपर्यंत राज्यभरात सी-व्हिजिल (C-Vigil app) ॲपवर एकूण १२५९ तक्रारी प्राप्त झाल्या. त्यापैकी १२५० तक्रारी निवडणूक आयोगाने निकाली काढल्या आहेत, अशी माहिती मुख्य निवडणूक अधिकारी कार्यालयाने शुक्रवारी दिली.

सजग नागरिकांना आचारसंहिता पालनासाठी सहकार्य करणारे सी-व्हिजिल (C-Vigil app) ॲप हे कोणत्याही ॲपस्टोअरमधून डाऊनलोड करता येते. या ॲपद्वारे नागरिकांना आचारसंहिता भंगाबाबत तक्रार करता येते. तक्रार दाखल झाल्यानंतर संबंधित पथकाद्वारे चौकशी करुन योग्य ती कारवाई करण्यात येईल, असे निवडणूक आयोगाकडून सांगण्यात आले.

हिंगोलीत एक कोटींची रोकड पकडली -

हिंगोलीमध्ये वाहनाची तपासणी करताना दोन कारमध्ये एक कोटी ४० लाख रुपायांची रोकड पोलिसांनी पकडली. पोलिसांनी याप्रकरणी दोन जणांना अटक केली. शिरुरमध्ये १८ लाख रुपयांची रोकड जप्त करण्यात आली. सतरा कमान पुलाजवळ तपासणी करताना पोलिसांनी एका व्यक्तीकडून १८ लाख रुपयांची रोकड जप्त केली. पनवेलजवळ पळस्पे चेक पोस्ट नाक्यावर सहा लाखांची रोकड जप्त केली.