भरत मोहोळकर, साम प्रतिनिधी

विधानसभा निवडणूकीत महायुतीच्या जागा वाटपात अजित पवारांच्या वाट्याला अवघ्या 52 जागा आल्या आहेत. त्यामुळे निकालानंतर अजित पवारांचं भवितव्य काय? असा प्रश्न राजकीय वर्तुळातून उपस्थित केला जातोय. मात्र नवाब मलिकांनी अजित पवार हे निवडणुकीनंतर सत्तेच्या राजकारणात किंग मेकर ठरणार असल्याचं भाकीत नवाब मलिकांनी केलंय. त्यामुळे राज्यात मोठी खळबळ उडालीय. तर राऊतांनी मात्र ठाकरेच किंग मेकर ठरणार असल्याचा पलटवार केलाय.

अजित पवारांच्या गेल्या पाच वर्षांच्या राजकीय वाटचालीवर एक नजर टाकली तर मलिकांच्या विधानाचा अर्थ लक्षात येईल. महाविकास आघाडीची निर्मिती होत असताना अजित पवारांनी फडणवीसांसोबत पहाटेचा शपथविधी केला. केवळ ८० तासांनंतर अजित पवारांनी राजीनामा दिला. त्यानंतर अजित पवार पुन्हा ठाकरेंच्या नेतृत्वातल्या मविआ सरकारमध्ये सामील झाले. साडे तीन वर्षांनंतर अजित पवार पुन्हा भाजपसोबत घरोबा करून महायुती सरकारमध्ये सहभागी झाले.

अजित पवारांचा हा राजकीय इतिहास आणि गेल्या पाच वर्षांतल्या युत्या आणि आघाड्यांचं राजकारण पाहिल्यानंतर राजकारणात काहीही होऊ शकतं हे सर्वांनी पाहिलंय. मात्र अजित दादांच्याच पक्षाचे माजी मंत्री असलेल्या मलिकांसारख्या ज्येष्ठ नेत्यानं असं विधान केल्यामुळे अजितदादा पुन्हा भाजपला सोडून मविआत येण्याची हॅटट्रिक करणार का? याचीच चर्चा आतापासून रंगू लागलीय.