Pawar Family Diwali Padwa Baramati : वेगळी राजकीय भूमिका (sharad pawar vs Ajit pawar) घेणारे अजित पवार हे बारामतीमध्ये होणाऱ्या पवार कुटुंबाच्या दिवाळी पाडवा कार्यक्रमापासूनही दूर राहणार आहेत. ते काटेवाडी येथील निवासस्थानी दिवाळी पाडवा साजरा करणार आहेत. बारामती येथील गोविंदबागेत गेली ५० वर्षांपासून दिवाळी पाडवा साजरा होत आहे. अजित पवार यांनी वेगळी राजकीय भूमिका घेतल्यानंतर यंदाच्या पाडव्याकडे सर्वांच्या नजरा खिळल्या होत्या. पण अजित पवार गोविंदबागेत होणाऱ्या पाडव्याला येणार नाहीत. अजित पवार यांनी आज बारामतीमध्ये याबाबत संकेत दिलेत.

बारामतीत यंदा दोन्ही पवारांचा पाडवा वेगळा होणार आहे. उपमुख्यमंत्री अजित पवार यांनी हे स्पष्ट केले आहे. नेहमीप्रमाणे गोविंद बागेमध्ये शरद पवारांचा पाडवा होत असतो. त्या ठिकाणी राज्यभरातील कार्यकर्ते शरद पवार यांना भेटत असतात. आणि या पाडव्याला सर्व पवार कुटुंब एकत्र असतं. यंदा मात्र अजित पवार आपला पाडवा स्वतंत्र करणार आहेत.

अजित पवार आपला पाडवा बारामती तालुक्यातील काटेवाडी येथील निवासस्थानी साजरा करणार आहेत. त्या ठिकाणी ते राज्य भरातील कार्यकर्त्यांना भेटणार आहेत. स्वतः अजित पवारांनी या संदर्भातील माहिती दिली आहे.