विनोद पाटील, साम टीव्ही, प्रतिनिधी

यंदाच्या लोकसभा निवडणुकीत भाजपनं चारशे पारचा नारा दिला असला तरी 2019 सारखी राजकीय परिस्थिती नसल्याचं विश्लेषकांचं म्हणणंय. त्यात काँग्रेसला मोदींना रोखण्यासाठी अनेक राज्यांमध्ये विरोधकांना एकत्र आणण्यात यश आलंय. या निवडणुकीत सत्ताधा-यांविरोधात प्रबळ मुद्दा दिसला नाही तशी मोदींची लाटही दिसली नाही.

त्यामुळे मोदी गेल्यावेळसारखं क्लिन स्वीप करतील का याबाबत साशंकता व्यक्त केली जात आहे. मतदानाच्या प्रत्येक टप्प्यानंतर राजकीय परिस्थिती बदलत गेली आहे. त्यामुळे निकालांबाबत आकलन करणं तेवढं सोप राहिलेलं नाही. देशाच्या राजकीय चित्राबाबत जशी उत्सुकता आहे तेवढीच उत्सुकता महाराष्ट्राबाबत निर्माण झालीय. निवडणूकशास्त्राचे अभ्यासक योगेंद्र यादवांनी महाराष्ट्रातील लोकसभेबाबत भविष्यवाणी केलीय.

महाराष्ट्रात महायुतीला 5 ते 15 जागांचं नुकसान होऊ शकतं 2019 मध्ये महायुतीला 48 पैकी 42 जागा मिळाल्या होत्या. यावेळी हा आकडा 25 ते 27 पर्यंत खाली येऊ शकतो. महाराष्ट्रात लोकसभेत मविआला 20 ते 22 जागा मिळू शकतात असं अंदाज योगेंद्र यादवांनी वर्तवलाय.

देशातल्या सर्वेक्षण करणाऱ्या अनेक संस्थांनी विविध अंदाज व्यक्त केले आहेत. तसंच ज्येष्ठ आणि श्रेष्ठ विश्लेषकांनीही भाकितं वर्तवलीयत. मात्र यंदा सर्वांच्या आकलनात मोठी तफावत असल्यामुळे देशातल्या आणि महाराष्ट्रातल्या चित्राबाबत अधिक उत्सुकता ताणली गेलीय.