भरत मोहळकर

पुणे: राज्यातील सर्वाधिक हायप्रोफाईल लढत मानल्या जाणाऱ्या बारामतीनंतर आता दोन्ही पवारांनी आपला मोर्चा शिरूरकडे वळवलाय. शिवाजीराव आढळराव पाटील यांच्यासाठी अजित पवार यांनी एका दिवसात थेट चार सभांचा धडाका लावला. तर अमोल कोल्हेंसाठी शरद पवारही मैदानात उतरले आहेत. त्यामुळे चौथ्या टप्प्यातही पवारविरुद्ध पवार असाच संघर्ष पहायला मिळतोय. राजकीय सोयीसाठी शिवसेनेचे आढळराव घड्याळाच्या चिन्हावर लढत असले तरी अजित पवारांनी शिरूरची निवडणूक वैयक्तिकरित्या प्रतिष्ठेची केली आहे. मी जे बोलतो ते करतोच. अमोल कोल्हेंना पाडणारच असा पणच अजित पवारांनी केलाय.

अमोल कोल्हे शरद पवारांसोबत राहिल्याने अजित पवारांना शिरूरमध्ये उमेदवार आयात करावा लागला. त्यामुळे शिवसेनेकडून इच्छूक असलेल्या आढळराव पाटील यांनी अजित पवार गटात प्रवेश करून हातात घड्याळ बांधलं. तर शरद पवारांनी अमोल कोल्हेंनाच पुन्हा संधी दिलीय. त्यामुऴे गेल्यावेळचेच प्रतिस्पर्धी मैदानात आहेत. आढळरावांसाठी अजित पवारांनी घोडेगाव, टाकळी हाजी, लोणी आणि ओतूर येथे दिवसभरात चार सभा घेतल्या. तर शरद पवारही कोल्हेंसाठी शिरूरच्या रणांगणात उतरले आहेत. पवारही कोल्हेंसाठी तीन सभा घेणार आहेत.

पवारांची 8 मे रोजी शिरूर तालुक्यात रांजणगाव येथे तर 10 मेला चाकण बाजार समिती परिसरात सभा होणार आहे. 11 मेला जुन्नर तालुक्यातील राजूरी येथे सभा होणार आहे. शिरूरमध्ये खरी लढत ही कोल्हे विरुद्ध आढळराव पाटील अशी होत असली तरी कोल्हे अजितपवारांसोबत न गेल्यानं त्यांनी कोल्हेंच्या पराभवाचा चंग बांधलाय. तर कोल्हेंनी तुतारी हाती घेतल्यामुळे पवारांनीही पुणे जिल्ह्यावरच आपलं वर्चस्व कायम ठेवण्यासाठी शिरूरवर विशेष लक्ष केंद्रित केलंय. त्यामुळे इथेही कोणता पवार सरस ठरणार याकडे लक्ष लागलंय.