सांगली, ता. १९ मे २०२४

सांगली लोकसभेचा खासदार कोण होणार? याबाबत बुलेटची पैज लावणे सांगलीमधील दोन युवकांना चांगलेच महागात पडले आहे. पैज लावणाऱ्या दोघांवर कवठेमहांकाळ पोलीस ठाण्यामध्ये जुगार अधिनियम अंतर्गत गुन्हा दाखल झाला आहे.

सांगली लोकसभेत महायुतीकडून संजय काका पाटील, महाविकास आघाडीकडून पैलवान चंद्रहार पाटील आणि काँग्रेसचे बंडखोर विशाल पाटील यांच्यामध्ये तिरंगी लढत झाली. उमेदवारीवरुन झालेल्या वादामुळे संपूर्ण राज्याचे या लढतीकडे लक्ष लागले आहे. सांगलीचा खासदार कोण होणार? याबाबत दावे प्रतिदावेही केले जात आहेत. यावरुनच दोघा युवकांनी चक्क बुलेटची पैज लावली होती.

शिरढोण येथील रमेश जाधव यांनी संजय काका पाटील हे निवडून येतील असा दावा केला होता. आणि गौस मुबारक मुलाणी यांनी अपक्ष उमेदवार विशाल पाटील विजयी होतील, असा दावा केला होता. यावरुनच दोघांनी आपापल्या बुलेट आणि युनिकॉर्न गाड्या एकमेकांना देण्याची पैज लावली होती, या पैजेचा मजकुरही सोशल मीडियावर व्हायरल झाला होता.

मात्र आता ही पैज लावणे दोघांनीही चांगलेच महागात पडले आहे. या प्रकरणी रमेश संभाजी जाधव आणि गौस मुबारक मुलाणी यांच्याविरोधात कवठेमहांकाळ पोलिसांनी दोघांवर गुन्हा दाखल केला आहे. जुगार अधिनियम कायद्याअंतर्गत पैज लावणाऱ्या दोघांवरही गुन्हे दाखल करण्यात आले आहेत.