Nashik Loksabha: मतदानाच्या पार्श्वभूमीवर नाशिक पोलीस अलर्ट; तब्बल ३ हजार ५१८ गुन्हेगारांवर प्रतिबंधात्मक कारवाई

नाशिक, ता. १९ मे २०२४

मुंबई, नाशिक, ठाणे, कल्याणसह लोकसभेच्या १३ मतदार संघांसाठी उद्या मतदान होणार आहे. मतदानाच्या पार्श्वभूमीवर नाशिकमध्ये पोलीस यंत्रणा अलर्ट झाल्या असून शहरातील तीन हजारपेक्षा जास्त सराईत गुन्हेगारांवर प्रतिबंधात्मक कारवाई करण्यात आली आहे.

राज्यातील लोकसभा निवडणुकांचा अंतिम टप्पा उद्या पार पडणार आहे. नाशिकमध्ये लोकसभेच्या पाचव्या टप्प्यात मतदान होत आहे. उद्या होणाऱ्या मतदानाच्या पार्श्वभूमीवर पोलिसांनी कडक बंदोबस्त ठेवला जात आहे. मतदान काळात कोणताही अनुचित प्रकार घडू नये, यासाठी पोलिसांकडून खबरदारी घेतली जात आहे.

त्यामुळे शहरातील उपद्रवींनी मतदानाला जावं आणि थेट घरात बसावं, असे आदेशच पोलिसांनी काढले आहेत. तसेच ३ हजार ५१८ सराईत गुन्हेगारांविरोधात प्रतिबंधात्मक कारवाई कारवाई करण्यात आली आहे. एमपीडीए, मोक्का, तडीपार, फौजदारी प्रक्रिया संहिते अंतर्गत या प्रतिबंधात्मक कारवाया करण्यात आल्या आहेत.

यांपैकी ३१३ जणांना मतदान केंद्र तसेच सार्वजनिक ठिकाणी फिरण्यास मनाई करण्यात आली आहे. या प्रतिबंधात्मक कारवाईत सराईत गुन्हेगारांसह काही राजकीय पदाधिकाऱ्यांचा देखील समावेश आहे. नाशिक शहरातील मतदान निर्भय वातावरणात पार पडावं, मतदानादरम्यान कोणताही अनुचित प्रकार घडू नये यासाठी पोलिसांकडून खबरदारीचा उपाय म्हणून हा निर्णय घेण्यात आला आहे.