रामू ढाकणे, छत्रपती संभाजीनगर|ता. १ एप्रिल २०२४

Sanjay Shirsat On Seat Sharing Formula:

राज्यातील महायुतीमध्ये लोकसभेच्या जागा वाटपावरुन जोर- बैठका सुरू आहेत. तसेच नाशिक आणि छत्रपती संभाजीनगरच्या जागेवरुन कलगितुरा सुरू असल्याचेही पाहायला मिळत आहे. अशातच आता महायुतीच्या जागा वाटपाची चर्चा अंतिम टप्प्यात आली असून शिवसेना शिंदे गट १६ जागा लढवणार असल्याची माहिती पक्ष प्रवक्ते संजय शिरसाट यांनी दिली आहे. (Maharashtra Loksabha Election 2024)

काय म्हणाले संजय शिरसाट?

"महायुतीच्या जागावाटप संदर्भात मुख्यमंत्र्याच्या बैठका सुरू आहेत, सर्व जागा निवडून येईल अशी रणनीती आहे. दोन दिवसात कोण कुठली जागा लढवणार हे स्पष्ट होईल, असे म्हणत नाशिक, सिंधुदूर्ग, संभाजीनगर या तिन्ही जागा आमच्याच असेल असा आमचा अंदाज आहे, चर्चा असणाऱ्या ३ जागा आम्हालाच मिळतील," असा दावा संजय शिरसाट (Sanjay Shirsat) यांनी केला आहे.

शिवसेना १६ जागा लढवणार?

तसेच "भाजपने (BJP) २४ जागा जाहीर केल्या आहेत, उर्वरित जागांची तयारी झाली आहे, आम्ही १६ ते १८ जागा लढवण्याचा तयारीत आहेत १६ पेक्षा कमी जागा आम्हाला मिळणार नाहीत. छत्रपती संभाजीनगरची जागा महत्वाची आहे. इथूनच शिवसेना प्रमुखांनी सुरुवात केली होती. कालच बैठक झाली आहे. हीजागा शिवसैनिकाला सुटावी अशी आमची मागणी आहे, अंतिम निर्णय मुख्यमंत्री (CM Eknath Shinde) घेतील," असेही संजय शिरसाट यावेळी म्हणाले.

उद्धव ठाकरेंवर टीका..

दरम्यान, यावेळी बोलताना संजय शिरसाट यांनी इंडिया आघाडीच्या (India Aaghadi) दिल्लीमधील सभेवरुन उद्धव ठाकरेंवर (Uddhav Thackeray) निशाणा साधला. "कालच्या भाषणाला शून्य प्रतिसाद होता. क्रमवारी पहिली तर स्वाभिमान कुठं गेला ते दिसले, आता तुमची जागा खूप खाली गेली आहे, पुन्हा स्वाभिमानाच्या गप्पा मारू नयेत," असा टोला शिरसाट यांनी लगावला.

('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)