नितीन पाटणकर, पुणे|ता. ३० मार्च २०२४

Baramati Loksabha Constituency News:

बारामती लोकसभा मतदार संघातून निवडणूक लढणार नसल्याचे शिवसेना शिंदे गटाचे नेते आणि माजी मंत्री विजय शिवतारे यांनी सांगितले आहे. त्यामुळे महायुतीमधील बारामती लोकसभेचा तिढा सुटल्याचे स्पष्ट झाले आहे. आज कार्यकर्त्यांसोबत झालेल्या बैठकीनंतर विजय शिवतारे यांनी निवडणूकीतून माघार घेतल्याची घोषणा केली आहे. (Maharashtra Loksabha News)

बारामती लोकसभेची जागा राष्ट्रवादी काँग्रेस पक्षाकडे असून सुनेत्रा पवार यांची उमेदवारी निश्चित मानली जात आहे. मात्र अजित पवार (Ajit Pawar) यांचे कट्टर विरोधक मानल्या जाणाऱ्या विजय शिवतारे यांनी बंडखोरी करत बारामतीमधून लोकसभा लढवणार असल्याची घोषणा केली होती. विजय शिवतारे यांच्या घोषणेनंतर मुख्यमंत्री एकनाथ शिंदे (Eknath Shinde), शंभूराज देसाई यांच्यासह अनेक नेत्यांनी त्यांची समजूत काढण्याचा प्रयत्न केला होता.

अखेर दोन दिवसांपूर्वी उपमुख्यमंत्री देवेंद्र फडणवीस (Devendra Fadanvis) यांच्यासोबत झालेल्या बैठकीनंतर विजय शिवतारे यांची नाराजी दूर झाल्याचे सांगण्यात येत होते. अखेर आज कार्यकर्त्यांशी झालेल्या बैठकीनंतर विजय शिवतारे यांनी बारामतीमधून लोकसभा लढवणार नसल्याचे जाहीर केले आहे. पुढच्या पिढ्यांचे नुकसान टाळण्यासाठी माघार घेत असल्याचे त्यांनी सांगितले आहे.

काय म्हणाले विजय शिवतारे?

"मुख्यमंत्री एकनाथ शिंदे, देवेंद्र फडणवीस यांच्याशी चर्चा झाल्यानंतरही मी माघार घेण्यास तयार नव्हतो. मी माघार घेत नसल्याने मुख्यमंत्री शिंदे माझ्यावर रागावले होते. मात्र आता गुंजवणीचे पाणी पुरंदरला देण्याचे आश्वासन दिले आहे. तसेच मोदींना पंतप्रधान करण्यासाठी माघार घेत आहे," असे विजय शिवतारे (Vijay Shivtare) यांनी सांगितले आहे.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)