अभिजित देशमुख

कल्याण लोकसभा मतदारसंघाचा निकाल जाहीर झाला आहे. कल्याणमधून श्रीकांत शिंदे यांचा विजय झालाय. सलग तिसऱ्यांदा खासदार श्रीकांत शिंदेंनी कल्याण लोकसभा मतदारसंघाचा गड राखला आहे. श्रीकांत शिंदे यांच्या विरोधात ठाकरे गटाच्या वैशाली दरेकर होत्या. त्यांचा पराभव झाला आहे. काही वेळातच याबाबत अधिकृत घोषणा करण्यात येणारे.

सध्या आलेल्या कलांनुसार, वैशाली दरेकर यांना ३,२४,५८८ मतं मिळालीत. तर डॉ. श्रीकांत शिंदे यांना ५,७२,४७८ मतं मिळालीयेत. त्यानुसार २,४७,८९० मतांनी वैशाली दरेकरांचा पराभव होताना दिसत आहे.

विजय मिळवल्यानंतर श्रीकांत शिंदेंनी साम टीव्हीला आपली प्रतिक्रिया दिली आहे. सगळ्या मतदारांचे मी आभार मानतो आणि धन्यवाद व्यक्त करतो. सर्वांनी सलग तिसऱ्यांदा माझ्यावर विश्वास ठेवला. पंतप्रधान नरेंद्र मोदी, मुख्यमंत्री एकनाथ शिंदे यांनी सुद्धा माझ्यावर विश्वास दाखवला आणि संधी दिली त्यामुळे त्यांचेही धन्यवाद.

राष्ट्रवादी अजित पवार गट आमच्यासोबत होता. त्यांच्यासह महायुतीच्या सर्वच पक्षांनी या विजयासाठी मेहनत केली आणि मोठी साथ दिली. त्यामुळेच माझा विजय होऊ शकला आणि पुन्हा एकदा कल्याण लोकसभा मतदारसंघातून विजयी झालो, असं श्रीकांत शिंदे म्हणाले.