Sanjay Raut On Ajit Pawar:

राज्यात लोकसभा निवडणुकीची रणधुमाळी सुरू आहे. अजित पवार आणि शरद पवारांमधील लढतीमुळे बारामतीची सीट तर प्रतिष्ठेची बनलीय. मतांसाठी नेतेमंडळी साम- दाम- दंड- भेद असे सर्व हातखंडे आजमवत आहेत. अशातच बारामती शिरुरमध्ये अजित पवार मतदारांना धमकी देत असल्याचा गंभीर आरोप ठाकरे गटाचे नेते संजय यांनी केलाय.

बारामतीच्या सभेतून संजय राऊतांनी अजितदादांवर घणाघाती आरोप केलेत. दुसरीकडे अजित पवारांनी सत्तेचा वापर करून लोकांना धमकावलं नाही, असं म्हटलंय. संजय राऊत म्हणाले आहेत की, ''बारामती आणि शिरूर मतदारसंघात स्वतः अजित पवार धमकी देत आहेत, तेही जाहीरपणे. गावागावात लोकांना ते धमकी देत आहेत. ते सांगता आहेत माझं आणि माझ्या पत्नीचं काम लारायचं, नाही तर नोटीस पाठवू.''

संजय राऊत अजित पवारांवर फक्त धमकीचे आरोप करून थांबले नाहीत. तर भाजप नेते चंद्रकांत पाटलांनाही धारेवर धरलंय. आम्हाला फक्त शरद पवारांना संपवायचंय, असं खुलं चॅलेंज चंद्रकांत पाटलांनी दिलं होतं. यावरून संजय राऊत यांनी टोला लगावत म्हटलं आहे की, आले किती गेले किती भरारा, पण शरद पवार तुमच्या नावाचा अजूनही दरारा.

दरम्यान, दिवसागणिक लोकसभा निवडणुकीचा प्रचार शिगेला पोहोचताना दिसतोय. बारामतीत काका- पुतण्याच्या लढतीवर स्वत: मोदी-शाह लक्ष ठेवून आहेत. त्यामुळे सुप्रिया सुळेंच्या प्रचारासाठी ठाकरेंच्या ताफ्यातली राऊतांची तोफ मैदानात उतरलीय. आता भाजपकडून अजितदादांना नेमकी काय रसद पुरवली जाणार हे पाहणं महत्त्वाचं ठरेल.