मार्च महिना उलटून आता एप्रिल महिना सुरु झाला आहे. मात्र अनेक महिलांना मार्च महिन्यात एक बाब जाणवलीये. ही बाब म्हणजे मार्च महिन्यात महिलांना अनेकदा मासिक पाळी उशिरा आल्याचं जाणवतं. डॉक्टरांच्या मते, मार्च महिन्यात मासिक पाळी उशिरा येण्याची अनेक कारणे आहेत.

नर्चरमधील स्त्रीरोगतज्ञ आणि आयव्हीएफ तज्ञ डॉ. अर्चना धवन बजाज यांनी याबाबत माहिती दिली आहे. डॉक्टरांच्या मार्च महिन्यात मासिक पाळी उशीरा का येते याचा खुलासा केला आहे.

हवामानातील बदल

डॉक्टरांच्या सांगण्यानुसार, हवामानातील बदलांमुळे शरीरातील हार्मोनल संतुलनावर परिणाम होऊ शकतो. मार्च महिन्यात हिवाळ्यातून उन्हाळ्याकडे हवामान बदलतं. या ऋतू बदलाचा शरीरावर परिणाम होतो. शरीराला बदलत्या हवामानाशी जुळवून घ्यायला वेळ लागतो. ज्यामुळे मासिक पाळी उशिरा येऊ शकते.

जीवनशैलीतील बदल

मार्च महिन्यात मासिक पाळी उशिरा येण्यामागे जीवनशैलीतील बदल हे देखील एक कारण असू शकतं. खाण्याच्या सवयी, झोपेचं वेळापत्रक आणि प्रवासातील बदलांमुळे या काळात लोक अधिक व्यस्त होतात. याचा शरीराच्या बायोलॉजीकल क्लॉकवर परिणाम होतो. ज्यामुळे मासिक पाळी उशिरा येऊ शकते.

ताण

मासिक पाळी उशिरा येण्यामागे तुमच्या दररोजच्या आयुष्यातील तणाव हे देखील एक कारण असू शकतं. मार्च महिन्यात लोक अनेकदा काम आणि अभ्यासाच्या दबावाखाली असतात. या वाढलेल्या तणावामुळे शरीरातील कॉर्टिसोल या हार्मोनची पातळी वाढते. ज्याचा थेट परिणाम मासिक पाळीवर होतो.

डॉक्टरांच्या मते, मासिक पाळीला अधूनमधून उशीर येणं सामान्य असू शकतं. जास्त काळ उशीर होणं सामान्य नाही. जर तुमची मासिक पाळी दीर्घकाळ उशिरा येत असेल तर त्याकडे दुर्लक्ष करू नका.

या गोष्टी जरूर लक्षात ठेवा

• दररोज ७ ते ८ तास झोप घ्या

• तणाव कमी करण्यासाठी आणि तो नियंत्रित करण्यासाठी दररोज योगाभ्यास आणि ध्यान करा.

• आरोग्यदायी आणि संतुलित आहार घ्या

• योग्य वजन राखा

• अचानक वजन वाढणं किंवा कमी होणं टाळा.

टीप : वरील माहिती आम्ही फक्त वाचक-प्रेक्षकांपर्यंत पोहचवत आहोत. याचं समर्थन अथवा दावा करत नाही. त्यामुळे कोणतेही उपचार, डाएट आणि औषधं तज्ज्ञांच्या सल्ल्यानं घ्यावीत.