दिवाळी म्हटलं की चिवड्याचा सुगंध घरभर दरवळतोच. पण बऱ्याचदा पातळ पोह्यांचा चिवडा बनवल्यानंतर काही तासांतच तो नरम पडतो, कुरकुरीतपणा जातो. हे टाळण्यासाठी काही सोप्या टिप्स लक्षात ठेवाव्यात. त्याचा वापर केल्याने तुमचा चिवडा शेवटपर्यंत कुरकुरीत राहील आणि आकसणारही नाही. शिवाय तुम्ही चिवडा बनवताना मोठ्या पातेल्या ऐवजी लहान कढईचा सुद्धा वापर करू शकता.

सगळ्यात आधी योग्य पोहे निवडणे महत्त्वाचं आहे. जास्त पातळ किंवा खूप हलके पोहे वापरू नका. मध्यम जाडीचे पातळ पोहे चिवड्यासाठी उत्तम असतात. पोहे मग चाळणीने चाळून त्यात काही खडा वगैरे आहे का ते तपासा. चिवडा बनवताना पोहे तळण्याऐवजी आधी कोरडे भाजून घ्या. मंद आचेवर ५-७ मिनिटे हलवत राहा. त्यामुळे पोह्यांचा ओलसरपणा कमी होतो आणि कुरकुरीतपणा अधिक काळ टिकतो.

१ किलो पोह्यांचे प्रमाण पुढील प्रमाणे

पोहे – १ किलो

शेंगदाणे – २०० ग्रॅम

डाळी (चणाडाळ किंवा फुटाणे) – १०० ग्रॅम

कढीपत्ता – २०-२५ पाने

हिरव्या मिरच्या – ८-१० (लहान तुकडे करून तळलेल्या)

साखर – २ टेबलस्पून

मीठ – चवीनुसार

हळद – १ टीस्पून

मोहरी – १ टीस्पून

तेल – साधारण १५० ते २०० मिली

कृती

पहिल्यांदा तेल गरम करून मोहरी, कढीपत्ता, मिरच्या, शेंगदाणे आणि डाळी भाजा. मग त्यात हळद, मीठ, साखर घाला. शेवटी भाजलेले पोहे घालून चांगले मिक्स करा. गॅस बंद करून थंड झाल्यावर हवाबंद डब्यात साठवा.

टिप

चिवडा पूर्ण थंड झाल्यानंतरच डब्यात भरावा, अन्यथा ओलसरपणामुळे तो नरम पडतो. या पद्धतीने बनवलेला चिवडा महिनाभर कुरकुरीत राहतो.