सध्याच्या धावपळीच्या जीवनशैलीत अनेकांचे झोपेकडे दुर्लक्ष होत असतं. विशेषत: तरुणांचे झोपेकडे दुर्लक्ष होत असतं. कामाचा ताण, सोशल मीडियाचा अतिवापर आणि वैयक्तिक वेळ मिळवण्यासाठी अनेकजण झोपेवर तडजोड करतात. पण तज्ज्ञांच्या मते, दररोज फक्त ५ ते ६ तासांची झोप घेणं शरीरासाठी आणि मानसिक आरोग्यासाठी अत्यंत घातक ठरू शकतं.

तज्ज्ञ सांगतात की, प्रौढ व्यक्तींना दररोज किमान सात तासांची झोप आवश्यक असते. कमी झोप घेतल्याने शरीरात थकवा येतो, एकाग्रता कमी होते आणि मानसिक आरोग्यावर परिणाम होतो. झोपेची कमतरता बऱ्याच काळ असेल तर स्ट्रेस, डिप्रेशन, गोष्टी लक्षात न राहणे आणि निर्णय घेण्याची क्षमता कमी होणे अशा समस्या जाणवू शकतात.

कमी झोपेमुळे शरीराची रोगप्रतिकारक शक्ती कमजोर होते. यामुळे डायबेटीज, हाय ब्लड प्रेशर आणि हृदयविकाराचा धोका वाढतो. संशोधनानुसार, रोज फक्त ५ ते ६ तास झोप घेणाऱ्यांचा अचानक मृत्यूचा धोका १५ टक्क्यांनी वाढतो. याशिवाय अपुऱ्या झोपेमुळे वाहन चालवताना झोप येणे, अपघात होणे अशा घटना घडू शकतात.

झोपेची कमतरता मेंदूच्या कार्यक्षमतेवर थेट परिणाम करते. लक्ष केंद्रीत करणे अवघड होते, स्मरणशक्ती कमजोर होते आणि दिवसभर सुस्ती येते. शारीरिकदृष्ट्याही याचे परिणाम दिसतात. डोळ्यांखाली काळी वर्तुळे, सूज आणि थकवा हे लक्षणे झोपेअभावी दिसतात. तज्ज्ञ सांगतात की प्रत्येक वयोगटानुसार झोपेची गरज वेगळी असते. १८ वर्षांवरील व्यक्तींना ७ ते ८ तास, तर किशोरवयीन मुलांना ८ ते १० तासांची झोप आवश्यक आहे. ६ ते १२ वर्षांच्या मुलांना ९ ते १२ तास आणि लहान बालकांना ११ ते १४ तास झोप घेणे अत्यावश्यक असते.