किडनी आपल्या शरीराचा अत्यंत महत्त्वाचा अवयव आहे. किडनी आपल्या शरीरातील रक्त शुद्ध करते आणि शरीरातील घातक द्रव्ये बाहेर टाकते. त्याचप्रमाणे पाणी तसंच इलेक्ट्रोलाइट्सचा समतोल राखते. अशा परिस्थितीत किडनी नीट काम करत नसेल किंवा ती खराब झाली, तर त्याचा परिणाम हळूहळू संपूर्ण शरीरावर दिसू लागतो.

तज्ज्ञांच्या म्हणण्यानुसार, किडनी खराब झाल्यानंतर खास करून रात्रीच्या वेळी काही लक्षणं दिसून येतात. या लक्षणांकडे वेळेत लक्ष दिलं नाही तर स्थिती गंभीर होऊ शकते.

वारंवार लघवी लागणं

किडनीच्या कार्यात बिघाड झाल्यास रात्री वारंवार लघवी लागण्याचा त्रास होतो. वारंवार लघवी होणं म्हणजे किडनीची कार्यक्षमता कमी झाल्याचे संकेत असू शकतात. सामान्यतः निरोगी किडनी लघवीवर नियंत्रण ठेवते, पण किडनीला हानी पोहोचली की लघवीची वारंवारता वाढते.

पाय आणि घोट्यांना सूज येणं

किडनी खराब झाल्यास शरीरातील सोडियमचा समतोल बिघडतो. त्यामुळे शरीरात पाणी साठू लागतं. यावेळी आणि पाय, घोटे तसंच हात सुजतात. दिवसभराच्या थकव्यानंतर रात्री विश्रांती घेताना ही सूज जास्त जाणवते.

त्वचेवर खाज आणि जळजळ होणं

किडनीचं काम शरीरातील घातक द्रव्ये बाहेर टाकणं आहे. पण त्यात अडथळा निर्माण झाल्यास ही घाण त्वचेवर साचते. त्यामुळे विशेषतः रात्री खाज येणे व त्वचेवर जळजळ जाणवते.

निद्रानाश व थकवा

किडनी खराब झाल्यास शरीरात विषारी द्रव्यं वाढू लागतात. यामुळे निद्रानाशाचा त्रास उद्भवतो. व्यक्तीला वारंवार झोप मोडणं, अस्वस्थता किंवा पूर्णपणे झोप न लागणं अशी समस्या निर्माण होऊ शकते. त्यासोबत दिवसभर थकवा जाणवतो आणि शरीरात ऊर्जा कमी पडते.

श्वास घेण्यास त्रास होणं

काही लोकांना रात्री आडवं झोपल्यावर श्वास घ्यायला त्रास होतो. हे किडनी निकामी होण्याचे गंभीर लक्षण असू शकतं. कारण अशा वेळी फुफ्फुसांमध्ये द्रव साचतो. अशी समस्या जाणवल्यास त्वरित डॉक्टरांचा सल्ला घ्यावा.