फीट असलेल्या लोकांना खास करून तरूणांना अचानक हृदयविकाराचा झटका येण्याची प्रकरण वाढताना दिसतायत. त्यामुळे जिम किंवा व्यायाम सुरू करण्याआधी काही तपासण्या करून घेतल्या तर फायदेशीर ठरतं असं तज्ज्ञांचं म्हणणं आहे.

विशेषत: ३० वर्षांपेक्षा जास्त वयाचे लोक ज्यांच्या कुटुंबात हृदयविकाराचा इतिहास आहे त्यांनी यांनी या तपासण्या करून घ्याव्यात. या तपासण्या केल्याने न दिसणारे किंवा न जाणवणारे हृदयविकार वेळेवर ओळखता येतात. ज्यामुळे मृत्यूचा धोका टाळता येऊ शकतो.

जिम सुरू करण्यापूर्वी कराव्यात अशा महत्त्वाच्या तपासण्या

ईसीजी

ईसीजीमध्ये हृदयाची विद्युत क्रिया रेकॉर्ड होते. यामुळे हृदयाचे ठोके अनियमित आहेत का किंवा त्यामध्ये अडथळा आहे का हे समजू शकते. ईसीजी तपासणी निर्णायक नसली तरी व्यायामादरम्यान धोकादायक ठरू शकणारे हृदयाचे विकार ओळखण्याचा हा चांगला प्रारंभिक उपाय आहे.

2D इको (Echocardiography)

ही अल्ट्रासाऊंडसारखी तपासणी आहे जी हृदयाचा आकार, पंपिंग क्षमता आणि झडपांचं कार्य दाखवते. यातून हायपरट्रॉफिक कार्डिओमायोपॅथी (हृदयाच्या स्नायूंची जाडी वाढणं) हा आजारही लक्षात येतो. ज्याचं अनेकदा निदान होत नाही आणि व्यायामाच्या वेळी हृदयविकाराचा झटका येऊ शकतो.

टीएमटी (Treadmill Test)

ही तपासणी व्यायामाच्या वेळी हृदयावर होणारा ताण तपासते. यातून व्यायामामुळे रक्तपुरवठा कमी होणं यासारख्या समस्या समजतात. जास्त वर्कआउट किंवा वेट ट्रेनिंग करायचं असणाऱ्यांसाठी हे विशेष महत्त्वाचे आहे.

हृदयाचे बायोमार्कर्स – Troponin आणि NT-proBNP

ही रक्त तपासणी हृदयाच्या स्नायूंना झालेला किरकोळ ताण किंवा नुकसान लक्षात आणून देते. ट्रोपोनिन हे हृदयाला झालेल्या लहानसहान इजा दर्शवतं तर NT-proBNP हृदयाच्या भिंतींवर ताण आहे का हे सांगतं.

लिपिड प्रोफाईल आणि HbA1c

लिपिड प्रोफाईलमधून रक्तातील कोलेस्ट्रॉल आणि ट्रायग्लिसराईड्सचे प्रमाण समजण्यास मदत होते. HbA1c ही तपासणी मागील 3 महिन्यांतील सरासरी साखरेचं प्रमाण दर्शवते. ज्यामुळे प्रीडायबिटीज किंवा डायबिटीज ओळखता येते.

डिस्क्लेमर : वरील माहिती आम्ही फक्त वाचक-प्रेक्षकांना देत आहोत. आम्ही याचं समर्थन अथवा दावा करत नाही. कोणतेही उपचार, डाएट आणि औषधं तज्ज्ञांच्या सल्ल्यानंच घ्यावीत.