लहान मुलांमध्ये कॅन्सर प्रमाण कमी असलं तर अनेकदा दुर्मिळ प्रकरणं समोर येताना दिसतात. असाच एक किडनीचा कॅन्सर ज्याची अनेकांना माहिती नसते. ‘विल्म्स ट्यूमर’ असं त्याचं नाव असून हा लहान मुलांमध्ये दिसणारा दुर्मिळ किडनीचा कॅन्सर मानला जातो.

हा कॅन्सर जरी दुर्मिळ असला तरी वेळेवर त्याचं निदान न झाल्यास तो धोकादायक ठरू शकतो. विशेषतः 2 ते 5 वयोगटातील मुलांमध्ये हा आजार अधिक प्रमाणात आढळतो आणि सुरुवातीला त्याची लक्षणं लगेच ओळखू येत नाहीत. त्यामुळे या आजाराची लक्षणं काय आहेत ती जाणून घेऊया.

पोटात सूज किंवा गाठ

या समस्येचं एक महत्त्वाचं आणि सामान्यपणे दुर्क्षिक केलं जाणारं लक्षण म्हणजे मुलाच्या पोटात दिसणारी सूज किंवा गाठ. ही सूज आल्याने मुलाच्या पोटात दुखत नाही. त्यामुळे पालकांना या गाठीचं निदान करणं शक्य होत नाही. अनेकदा मुलाला आंघोळ घालताना किंवा खेळताना ही गाठ लक्षात येते. मुख्य म्हणजे ही गाठ ही पोट फुगल्यासारखी दिसत नाही. काही पालक याकडे बद्धकोष्ठता किंवा साधा पोटदुखीचा त्रास समजून दुर्लक्ष करतात.

विनाकारण येणारा ताप

जर मुलाला वारंवार ताप येत असेल तर त्याकडे दुर्लक्ष करू नये. लहान मुलांना कोणताही ठोस कारण नसताना सतत ताप येत असेल तर ते गंभीर गोष्टीचं लक्षण असू शकतं. अशा मुलांमध्ये थकवा, भूक कमी होणं आणि नेहमीच अशक्तपणा जाणवणं ही लक्षणंही दिसून येतात.

लघवीमध्ये रक्त दिसणं

लहान मुलांच्या लघवीमध्ये जर तुम्हाला रक्त दिसत असेल तर तातडीने डॉक्टरांकडे जाणं महत्त्वाचं आहे. थेट लघवीत रक्त दिसण्याशिवाय लघवीचा रंग हलका गुलाबी दिसू शकतो. अनेक वेळा याकडे युरीनरी इन्फेक्शन म्हणूनही दुर्लक्ष केलं जातं. मात्र जराही त्रास दिसला तरी डॉक्टरांचा सल्ला घेऊन त्याबाबतच्या टेस्ट करून घ्याव्यात.

पोटदुखी

काही मुलं पोटदुखी किंवा पोटाच्या बाजूला दुखण्याची तक्रार करतात. हा त्रास मुलांना खेळताना किंवा कोणतीही हालचाल करताना होऊ शकतं. हे दुखणं अनेकदा गॅस किंवा मसल पेन समजून दुर्लक्ष केलं जातं. पण एकाच ठिकाणी वारंवार त्रास होत असेल तर ते गंभीर संकेत असू शकतात.