हृदयाच्या आजारांचं प्रमाण सध्या वाढताना दिसतंय. अशातच हृदयरोगींना एक मोठा झटका बसणार आहे. आता देशात हृदयरोग्यांवर उपचार महागणार आहेत. राष्ट्रीय औषध किंमत प्राधिकरणाने कोरोनरी स्टेंटचं उत्पादन आणि आयात करणाऱ्या कंपन्यांना किंमती वाढवण्यास मान्यता दिली आहे. वाढती महागाई लक्षात घेऊन हा निर्णय घेण्यात आला आहे.

२७ मार्च रोजी जारी केलेल्या आदेशात, एनपीपीएने म्हटलं आहे की, ज्या कंपन्यांच्या स्टेंटच्या किरकोळ किमती त्यांनी निश्चित केलेल्या कमाल मर्यादेपेक्षा कमी आहेत, त्या २०२४ च्या घाऊक किंमत निर्देशांकनुसार किमती १.७४०२८% पर्यंत वाढवल्या जाऊ शकतात.

घाऊक किंमत निर्देशांक म्हणजेच Wholesale price index मधील बदलांच्या आधारे, नियामकाने बुधवारी राष्ट्रीय आवश्यक औषधांच्या यादीत समाविष्ट असलेल्या अनुसूचित औषधांच्या किमतीत १.७४% पर्यंत वाढ करण्याची परवानगी दिल्यानंतर हा निर्णय घेण्यात आला आहे.

कशावर होणार याचा परिणाम?

या वाढीसह बेअर मेटल स्टेंटची कमाल किंमत आता प्रति युनिट ₹ १०,६९२.६९ होणार आहे. याचसोबत तर ड्रग-एल्युटिंग, बायोमेटॅलिक आणि बायोरेसॉर्बेबल व्हॅस्क्युलर स्कॅफोल्ड (BVS) स्टेंटची कमाल किंमत प्रति युनिट ₹ ३८,९३३.१४ निश्चित करण्यात आलीये .

NPPA केलं स्पष्ट

यावेळी एनपीपीएने स्पष्ट केलंय की, जे उत्पादक निश्चित केलेल्या कमाल किमतीचं पालन करत नाहीत त्यांना ड्रग्स प्राइसेज़ कंट्रोल ऑर्डर २०१३ च्या तरतुदींनुसार व्याजासह वसूल केलेली जास्तीची रक्कम जमा करावी लागणार आहे. एनपीपीएने सर्व किरकोळ विक्रेते आणि डीलर्सना त्यांच्या व्यवसायाच्या ठिकाणी किंमतीची यादी स्पष्टपणे प्रदर्शित करण्याचे निर्देश देण्यात आले आहेत. हृदयरोगाच्या वाढत्या संख्येचा विचार करता स्टेंटच्या कमाल किमतीत झालेली ही वाढ लक्षणीय मानली जाते.

नॅशनल क्राइम रेकॉर्ड्स ब्युरोच्या ताज्या आकडेवारीनुसार, २०२२ मध्ये ३२,४५७ लोकांचा हृदयविकाराने मृत्यू झाला. हा मृत्यूचा आकडा २०२१ मध्ये नोंदवलेल्या २८,४१३ मृत्यूंपेक्षा १२.५% जास्त असल्याची माहिती आहे.