वाढदिवस असो किंवा मग काही कार्यक्रम सर्वांना सेलिब्रेशनसाठी केक लागतोच. अशात सध्या रवा केकचे बरेच फॅन आहेत. बाजारात बेकरीमध्ये मिळणार रवा केक तुम्हालाही आवडत असेल. हा केक आपण जेवणात गोड पदार्थ नसेल तेव्हा देखील खाऊ शकतो. अशात रोज रोज बाजारातून केक आणण्यापेक्षा घरच्याघरी तो कसा बनवायचा याची माहिती जाणून घेऊ.

साहित्य

बटर

साखर

मैदा

दूध

दही

बेकिंग सोडा

इसेन्स

सुका मेवा

रवा

तूप

कृती

रवा केक बनवण्यासाठी सर्वात आधी एका भांड्यात बटर घ्या. हे बटर छान फेटून घ्या. त्यानंतर यामध्ये दही मिक्स करा. यात आपल्याला पाणी अजिबात टाकायचे नाही. पुढे या मिश्रणात साखर छान मिक्स करून घ्या. मिश्रण एकजीव होत असताना यामध्ये इसेन्स, दूध आणि रवा मिक्स करा. तसेच नंतर यामध्ये बेकिंग सोडा देखील मिक्स करा.

हे सर्व मिश्रण एका भांड्यात काढून 15 मिनिटे तसेच ठेवा. त्यावेळात सर्वात आधी गॅसवर एक कढई ठेवा आणि सुका मेवा म्हणजेच ड्रायफ्रूटसचे बारीक काप करून घ्या. हे काप तुपात छान तळून घ्या. तसेच कुकरमध्ये थोडे मीठ टाकून ठेवा. 15 मिनिटे झाल्यावर या कुकरमध्ये केकचे तयार बॅटर ठेवून द्या.

केकचे मिश्रण कुकरमध्ये ठेवल्यावर कूकरच्या झाकणाची शिट्टी काढून टाका आणि शिट्टी शिवाय त्याचे झाकण बंद करा. साधारण 30 मिनिटे कुकर उघडू नका. 30 मिनिटांनी कुकर उघडून केकच्या अगदी मधोमध एका स्टिकने केक पूर्ण शिजला आहे की नाही हे तपासा. केक तयार झाला असेल तर तो बाहेर काढून घ्या आणि थंड होऊ द्या.

केक पूर्ण थंड झाल्याशिवाय बाहेर काढू नका. आता येथे केक थंड झाल्यावर सहज बाहेर निघावा यासाठी एक ट्रिक सांगत आहे. जेव्हा तुम्ही केकचे बॅटर एका भांड्यात ठेवाल तेव्हा त्या भांड्याला तेल किंवा बटर आधी लावून घ्या. असे केल्याने केक थंड झाल्यावर सहज बाहेर निघतो.