प्रोस्टेट ही पुरुषांच्या शरीरातील एक अत्यंत महत्त्वाची ग्रंथी आहे. ही ग्रंथी मूत्राशय म्हणजेच ब्लाडरच्या खाली आणि मूत्रमार्गाच्या सभोवती असते. आकाराने ती लहान, गोल आणि अक्रोडासारखी दिसते. प्रोस्टेटचे मुख्य काम म्हणजे शुक्राणूंचं संरक्षण करणं आणि वीर्य पातळ ठेवणे, जे पुरुषांच्या प्रजननक्षमतेसाठी आवश्यक असतं. मात्र आजच्या काळात पुरुषांना सर्वाधिक समस्या याच ग्रंथीशी संबंधित दिसतात.

प्रजनन क्षमतेवर होतो परिणाम

प्रोस्टेटशी संबंधित अनेक प्रकारच्या समस्या आज पुरुषांमध्ये वाढताना दिसतेय. यामध्ये प्रोस्टेटचा आकार वाढणं, प्रोस्टेटला सूज येणं आणि प्रोस्टेट कॅन्सर यांचा समावेश होतो. या समस्यांमुळे पुरुषांच्या प्रजनन क्षमतेवर थेट परिणाम होतो. वाढतं वय ही यामागची एक मोठी कारणं असून साधारणपणे साठ वर्षांनंतर या समस्या अधिक प्रमाणात जाणवू लागतात.

याशिवाय दीर्घकाळ बसून राहणं, शरीराला घट्ट आणि अनफिट कपडे घालणं, चुकीचा आहार आणि शारीरिक हालचालींचा अभाव यामुळेही प्रोस्टेटच्या समस्या उद्भवू शकतात.

शतावरी पावडर आणि इतर घरगुती उपाय

हॉर्मोन्समधील बदलांमुळेही प्रोस्टेटमध्ये त्रास निर्माण होऊ शकतो. या समस्या टाळण्यासाठी काही पारंपरिक आणि घरगुती उपाय उपयुक्त ठरतात. शतावरीच्या मुळांपासून तयार केलेली पावडर रात्री झोपण्यापूर्वी दुधात मिसळून घेणं फायदेशीर असते. शतावरीमध्ये सूज कमी करण्याचे गुणधर्म आहेत. त्याचप्रमाणे ती ब्लॅडर म्हणजेच मूत्राशय स्वच्छ ठेवण्यास मदत करते.

टोमॅटो आणि भोपळ्याच्या बिया

टोमॅटो आणि भोपळ्याच्या बिया यांचं सेवन देखील उपयुक्त आहे. भोपळ्याच्या बियांमध्ये प्रोटीन, मॅग्नेशियम, झिंक, फायबर आणि अँटिऑक्सिडंट्स असतात. जे शरीरातील सूज कमी करण्यास मदत करतात. टोमॅटो आणि पेरू यांच्यामध्ये लायकोपीन नावाचे घटक असतात. लायकोपीन संसर्ग कमी करण्यास मदत करते आणि प्रोस्टेट कॅन्सरचा धोका कमी करण्यासही उपयोगी ठरतं.

या पदार्थांचा आहारात समावेश करा

डाळिंबाचा रस प्रोस्टेट पेशींना मजबूत बनवतो. डाळिंबामध्ये अँटिऑक्सिडंट्स आणि जीवनसत्त्वं मुबलक प्रमाणात असतात. जे प्रोस्टेटच्या एकूण आरोग्यासाठी लाभदायक मानले जातात. त्याचप्रमाणे मेथीचं पाणी मूत्रमार्गातील संसर्ग कमी करण्यास मदत करतं. यासाठी मेथीचे दाणे रात्री भिजवून ठेवावेत आणि सकाळी रिकाम्या पोटी ते पाणी प्यावं. यामुळे लघवीला योग्य प्रकारे प्रवाह मिळतो आणि ब्लॅडर स्वच्छ राहतो.

टीप : वरील माहिती आम्ही फक्त वाचक-प्रेक्षकांपर्यंत पोहचवत आहोत. याचं समर्थन अथवा दावा करत नाही. त्यामुळे कोणतेही उपचार, डाएट आणि औषधं तज्ज्ञांच्या सल्ल्यानं घ्यावीत.