महाराष्ट्रात अनेक सण मोठ्या धामधुमीत साजरे केले जातात. गणेशोत्सवानतंर आता नवरात्रीच्या सणाची सगळ्यांना उत्सुकता लागली आहे. तर यंदा शारदीय नवरात्र २२ सप्टेंबरपासून सुरू होत आहे. विशेष म्हणजे, यंदा नवरात्र १० दिवसांची असणार आहे. दरवेळेस नवरात्र ९ दिवसांची असते, मात्र यावेळी तिथींच्या संयोगामुळे भक्तांना १० दिवस दुर्गापूजेचा आनंद घेता येणार आहे.

यावर्षी श्राद्ध कमी झाले असून नवरात्र वाढले आहे. त्यामुळे दुर्गा पूजेचे १० दिवस सगळ्यांसाठी लाभाचे ठरणार आहेत. हे अत्यंत शुभ मानले जाते. या वर्षी देवीचे आगमन हत्तीवरुन होणार आहे. ज्योतिषशास्त्रानुसार हत्तीवर स्वार होऊन देवीचे आगमन सुख, समृद्धी आणि शुभ फलदायी मानले जाते.

हिंदू पंचांगानुसार, नवरात्र वर्षातून चार वेळा येते. त्यापैकी चैत्र आणि आश्विन नवरात्र मुख्य असून गृहस्थ भक्त मोठ्या भक्तिभावाने साजरे करतात.आश्विन महिन्यातील शुक्ल पक्षातील प्रतिपदा तिथी २१ सप्टेंबर रोजी दुपारी १:३० पासून सुरू होत आहे. सूर्योदय व्यापिनी तिथीनुसार नवरात्राची सुरुवात २२ सप्टेंबर रोजी होईल. या वेळी अष्टमी पूजा व कन्या पूजन ३० सप्टेंबर रोजी होईल, तर महानवमी १ ऑक्टोबर रोजी साजरी केली जाईल.

कलश स्थापनेसाठी शुभ मुहूर्त सकाळी ६:०९ ते ८:१५, दुसरा ८:१५ ते १०:३६, तसेच अभिजित मुहूर्त ११:४९ ते १२:३८ असा सांगितला गेला आहे. नवरात्र पूजेत दुर्गा सप्तशती, दुर्गा स्तुती आणि दुर्गा चालीसाचे पठण विशेष फलदायी ठरते. नवरात्रात माता दुर्गा धन, धान्य, सुख आणि समृद्धीचे आशीर्वाद देतात.