आजकाल ऑफिसमध्ये काम करणाऱ्या लोकांना सांधे व स्नायू दुखीच्या समस्या जास्त प्रमाणात जाणवतात. शक्यतो जास्तीत जास्तवेळ एका ठिकाणी बसून किंवा सांध्यांची हालचाल न झाल्यामुळे अशा समस्या उद्भवतात. पण तुम्हाला माहीत आहे का? अतिप्रमाणात घेतलेली एअर कंडिशनिंगची (AC) हवा देखील यामागचे मोठे कारण असू शकते. ऑफिसमध्ये एअर कंडिशनिंगच्या हवेचे तापमान उपकरणांच्या सोयीप्रमाणे नियंत्रित केलं जातं. पण हे तापमान मानवी शरीरासाठी धोकादायक ठरू शकतं.

ऑफिसमध्ये किंवा मोठ्या कारखान्यांमध्ये अनेक इलेक्ट्रॉनिक उपकरणे असतात. गरम हवेमुळे या उपकरणांचे इंटरनेट टेम्प्रेचर वाढतं. ज्यामुळे ते अचानक बंद पडतात किंवा अतिप्रमाणात गरम होऊन स्फोट होण्याची शक्यता असते. म्हणून एअर कंडिशनिंगच्या (AC) हवेचे तापमान खुपच कमी ठेवलं जातं. शिवाय अनेक घरांमध्ये देखील थंडाव्यासाठी एअर कंडिशनिंगचा वापर केला जातो. एअर कंडिशनिंगची हवा आपल्याला आरामदायक थंडावा तर देतेच. त्याचसोबत सांधे व स्नायूंचे दुखणेही देते. आपल्या शरीराला अतिप्रमाणात थंडावा मिळाला तर, रक्ताभिसरण कमी होतं. यामुळे सांधे आखडतात आणि दुखायला लागतात.

शिवाय ऑफिसमध्ये तासन् तास एकाच ठिकाणी बसून काम करायचे असते अशावेळी स्नायूंची हालचाल होत नाही. स्नायूंची लवचिकता कमी होते आणि ताठरपणा येऊन दुखणे सुरू होतं. तसेच आपले शरीर जास्तवेळ थंड वातावरणात राहील्यामुळे शरीरातील ऊर्जेचे प्रमाण कमी होतं. यामुळे सुस्ती आणि थकवा येतो. ज्यांना आधीपासून सांध्यांच्या समस्या आहेत त्यांनी अधिक थंड वातावरणात राहील्यास समस्या जास्त वाढू शकतात.

ऑफिसमध्ये एअर कंडिशनिंच्या थंड वातावरणात बसून काम करण्याशिवाय पर्याय नसतो. यावर उपाय म्हणून तुम्ही अधूनमधून थंड वातावरणातून बाहेर जा. शरीराला थंड हवेपासून वाचवण्यासाठी शाल किंवा स्वेटरचा वापर करा. गरम पाणी प्या, ज्यामुळे रक्ताभिसरण सुधारेल व सांधे दुखीला आराम मिळेल. एकाच ठिकाणी न बसता अर्ध्या-एका तासाने शरीराची हालचाल करा. यामुळे सांध्यांमधील लवचिकता टिकून राहील.