आजकाल वजन कमी करण्यासाठी आणि फिट राहण्यासाठी लोक अनेक प्रकारच्या डाएट पद्धतींचा वापर करतात. त्यातलीच सर्वात लोकप्रिय पद्धत म्हणजे इंटरमिटंट फास्टिंग. पण ही पद्धत खरोखरच सुरक्षित आहे का? नुकतच जर्नल ऑफ अमेरिकन हार्ट असोसिएशन मध्ये प्रकाशित झालेल्या एका महत्त्वाच्या संशोधनाने दाखवून दिलंय की, इंटरमिटंट फास्टिंगमुळे आरोग्यावर गंभीर परिणाम होऊ शकतात.

संशोधन काय सांगतं?

या अभ्यासात हजारो लोकांचा दीर्घकाळ निरीक्षण करून निष्कर्ष काढण्यात आला. त्यात दिसून आलं की, जे लोक इंटरमिटंट फास्टिंग करतात त्यांना हृदयरोग आणि स्ट्रोकमुळे मृत्यू होण्याचा धोका अधिक असतो. म्हणजेच ही पद्धत अल्पकाळासाठी काहींना फायदेशीर ठरली तरी दीर्घकाळ ती आरोग्यास हानीकारक ठरू शकते.

इंटरमिटंट फास्टिंग म्हणजे काय?

या डाएट पद्धतीत लोक आपल्या खाण्याचं वेळापत्रक ठरवतात. उदाहरणार्थ १६ तास उपवास आणि ८ तास खाण्याची वेळ. असं केल्याने शरीरातील चरबी लवकर कमी होते, मेटाबॉलिझम सुधारतो असं मानलं जातं. पण जर हे इंटरमिटंट फास्टिंग चालू ठेवलं किंवा योग्य आहार घेतला नाही तर शरीराला आवश्यक पोषकतत्वांची कमतरता भासते.

कोणते दुष्परिणाम होऊ शकतात?

• पोषणाची कमतरता – ठराविक वेळेत मर्यादित आहारामुळे व्हिटॅमिन्स आणि मिनरल्सची कमतरता भासू शकते.

• हृदयविकाराचा धोका – संशोधनानुसार, दीर्घकाळ या पद्धतीचा अवलंब केल्यास हृदयरोग आणि स्ट्रोकचा धोका वाढतो.

• ब्लड शुगर असंतुलन – मधुमेह असलेल्या रुग्णांमध्ये साखरेचं प्रमाण अचानक कमी जास्त होऊ शकतं.

• मानसिक ताणतणाव – सतत भूक लागल्यामुळे चिडचिड, मूड स्विंग्स आणि मानसिक अस्वस्थता निर्माण होऊ शकते.

कोणासाठी जास्त धोकादायक?

तज्ज्ञांच्या मते, ज्यांना हाय ब्लड प्रेशर, डायबिटीज, हृदयाचे आजार किंवा हॉर्मोनल असंतुलन आहे, त्यांनी डॉक्टरांचा सल्ला घेतल्याशिवाय इंटरमिटंट फास्टिंग सुरू करू नये.

काय काळजी घ्यावी?

• नेहमी डॉक्टर किंवा न्यूट्रिशनिस्टच्या मार्गदर्शनाखालीच ही पद्धत सुरू करावी.

• सलग अनेक महिने दीर्घकाळ उपवास करणं टाळावं.

• आहारात नेहमी पौष्टिक अन्न, भरपूर पाणी आणि पोषकतत्वं असली पाहिजे.

• शरीर जे संकेत देतंय ते दुर्लक्षित करू नयेत.

डिस्क्लेमर : वरील माहिती आम्ही फक्त वाचक-प्रेक्षकांना देत आहोत. आम्ही याचं समर्थन अथवा दावा करत नाही. कोणतेही उपचार, डाएट आणि औषधं तज्ज्ञांच्या सल्ल्यानंच घ्यावीत.