रक्तात साखरेची पातळी कायम जास्त राहिली तर ती हळूहळू शरीराच्या महत्त्वाच्या अवयवांवर परिणाम करू लागते. सुरुवातीला या लक्षणांकडे दुर्लक्ष केलं जातं पण वेळेत लक्ष दिलं नाही तर ही समस्या हृदयविकार, किडनी निकामी होणं, डोळ्यांचं कमजोर होणं, जखमा न भरून येणं किंवा वारंवार होणाऱ्या इन्फेक्शन रूप घेऊ शकतं.

प्रत्येक आजाराप्रमाणे मधुमेहाची देखील काही लक्षणं दिसून येतात. यावेळी अशा लक्षणांकडे दुर्लक्ष न करता त्याची वेळेत दखल घेणं गरजेचं आहे. जेणेकरून त्यावर वेळेत उपचार देखील होऊ शकतात.

जास्त प्रमाणात तहान लागणं

शुगर जास्त असल्यावर शरीर तिचा साठा कमी करण्यासाठी जास्त प्रमाणात लघवी करायला लागतं. त्यामुळे शरीरातील पाण्याचं प्रमाण कमी होतं आणि तहान अधिक लागते. दिवसभर पाणी पीत राहूनही तहान भागत नाही विशेषतः रात्री उठून पाणी प्यावंसं वाटतं, तर हे लक्षात घेण्यासारखं लक्षण आहे.

वारंवार लघवी

जेव्हा रक्तातील साखरेची पातळी 180 mg/dL पेक्षा जास्त होते तेव्हा किडनी तिला लघवीद्वारे बाहेर टाकण्याचा प्रयत्न करते. त्यामुळे दिवसात अनेक वेळा लघवी लागणं, रात्री उठून लघवीसाठी जाणं सुरू होतं. यामुळे झोपेत व्यत्यय येतो आणि थकवा वाढतो.

सतत भूक लागणे

शरीरात साखर असली तरी ती पेशींमध्ये शोषली जात नाही कारण इन्सुलिन कमी असतं किंवा शरीर त्याला प्रतिसाद देत नाही. यामुळे मेंदूला ‘भूक’ असल्याचा सिग्नल मिळतो आणि व्यक्ती सतत खाण्याच्या शोधात असते. खाणं वाढलं तरी पोट भरल्यासारखं वाटत नाही.

वजन अचानक कमी होणं

इन्सुलिनची प्रक्रिया नीट न झाल्यामुळे शरीर साखरेचा वापर ऊर्जा मिळवण्यासाठी करू शकत नाही. मग शरीर चरबी आणि स्नायू यांच्याद्वारे ऊर्जा मिळवतं. त्यामुळे अचानक वजन कमी झाल्याचं दिसून येतं. हे विशेषतः टाईप १ डायबेटिसमध्ये दिसतं.

थकवा आणि अशक्तपणा

शरीराला ऊर्जा मिळवण्यासाठी साखर महत्त्वाची असते. पण ती पेशींमध्ये शोषली न गेल्यामुळे शरीरात ऊर्जा कमी भासते. त्यामुळे थोडं काम केलं तरी थकवा जाणवतो. हे थकवा आणि सुस्ती रोजच्या कामात अडथळा निर्माण करू शकतं.

धुसर दिसणं

रक्तात साखर जास्त असल्यामुळे डोळ्यांतील पेशींपासून द्रव खेचला जातो, ज्यामुळे लेन्स फुगते आणि धुसर दिसू लागतं. हे सुरुवातीला तात्पुरतं असलं, तरी शुगरवर नियंत्रण न घेतल्यास डोळ्यांतील रक्तवाहिन्यांचं नुकसान होऊ शकतं. त्यामुळे डोळ्यांची तपासणी गरजेची आहे.

डिस्क्लेमर : वरील माहिती आम्ही फक्त वाचक-प्रेक्षकांना देत आहोत. आम्ही याचं समर्थन अथवा दावा करत नाही. कोणतेही उपचार, डाएट आणि औषधं तज्ज्ञांच्या सल्ल्यानंच घ्यावीत.