Bharleli Karli : कारले म्हटले की अनेकजण नाक मुरडतात तर काही जण आवडीने खातात. कडू कारल्यामुळे आपण त्याचा आहारात वापरही कमी प्रमाणात करतो. त्याच्या कडूपणामुळे व चवीमुळे कारले अनेकांना आवडत नाही.

कारल्यामध्ये जीवनसत्त्व (Vitamins) ब -१, ब-२ व ब-३ आणि जीवनसत्त्व क चा उत्तम स्त्रोत आहे. यामध्ये लोह व कॅल्शियम देखील आढळते. पण रक्तातील साखर नियंत्रणात ठेवण्यासाठी व मधुमेहासाठी (Diabetes) कडू कारले अतिशय फायदेशीर समजले जाते.

परंतु, या कारल्याची टेस्ट आणखी वाढवण्यासाठी व मुलांनी ते आवडीने खाण्यासाठी आपण त्याची बनवण्याची पद्धत बदली तर त्याची चव अधिक छान लागते. चला जाणून घेऊया भरलेले कारले (bitter gourd) बनवण्याची योग्य पद्धत

1. साहित्य

• कारले - 8 ते10

• जिरे - 1/2 टीस्पून

• हळद (Turmeric) - 1/2 टीस्पून

• शेंगदाण्याचा कूट - 8 ते 10 चमचे

• बेसनाचे पीठ- २ चमचे

• बडीशेप पावडर - 2 टीस्पून

• लाल तिखट - 1/2 टीस्पून

• धणे पावडर - 2 टीस्पून

• हिंग- 1 चिमूटभर

• आमचूर पावडर- 1 टीस्पून

• तेल - 4-5 चमचे

• मीठ - चवीनुसार

2. कृती

• चवीनुसार आणि पौष्टिकतेने भरलेली कारल्याची भाजी बनवण्यासाठी प्रथम कारले नीट धुवून घ्या. नंतर चाकूच्या साहाय्याने कारल्याचा वरचा भाग सोलून घ्या आणि एका भांड्यात काढा.

• सोललेली कारली वेगळ्या भांड्यात ठेवा. आता कारल्याच्या सालींवर थोडे मीठ घालून १५ मिनिटे झाकून ठेवा.

• यानंतर, कारले घेऊन ते मधूनमधून चिरुन घ्या. त्याच्या आत असणाऱ्या बिया व इतर गोष्टी काढून घ्या. पुन्हा एकदा पाण्याने धुवून घ्या.

• आता कारल्याच्या आत आणि बाहेर थोडे मीठ चोळा आणि अर्धा तास बाजूला ठेवा.

• थोड्या वेळानंतर, कारल्याला पुन्हा एकदा पाण्याने धुवा म्हणजे कारल्यावरील मीठ निघून जाईल.

• आता कारल्याचे साल घेऊन ते पाण्याने २-३ वेळा धुवावे व नंतर पाणी पिळून घ्यावे.

• आता कढईत १ चमचा तेल टाकून ते गरम करा. तेल गरम झाल्यावर त्यात जिरे व हिंग घालून परता.

• काही सेकंदांनंतर तेलात हळद, धणे पूड, बडीशेप पूड घाला आणि चांगले परतून घ्या.

• नंतर यात लाल तिखट, आमचूर पावडर आणि चवीनुसार मीठ घालून मिक्स करा. नंतर त्यात शेंगदाण्याचा कूट व बेसनाचे पीठ घालून मिश्रण ५ मिनिटे भाजल्यानंतर गॅस बंद करा. कारल्यात भरण्यासाठी सारण तयार आहे. आता कारले घेऊन त्यात दाबून सारण भरा.

• आता कढईत ३-४ चमचे तेल टाकून गरम करा. तेल गरम झाल्यावर त्यात भरलेले कारले टाका आणि झाकण ठेवून 10 मिनिटे शिजवा.

• कारले चांगले तळून तपकिरी होईपर्यंत शिजवा. यानंतर गॅस बंद करा. तयार आहे चविष्ट असे भरलेले कारले.