Homemade Shrikhand Recipe:

गुढीपाडवा हा आनंदाचा, चैतन्याचा आणि उत्साहाचा दिवस. चैत्र महिन्याच्या शुक्ल पक्षाच्या प्रतिपदेपासून मराठी नववर्षाची सुरुवात होते. हिंदू दिनदिर्शिकेप्रमाणे चैत्र शुद्ध प्रतिपदेला म्हणजेच वसंत ऋतूच्या पहिल्या दिवसाला गुढीपाडवा साजरा (Celebrate) केला जातो.

यंदा हा पाडवा ९ एप्रिलला मंगळवारी साजरा केला जाणार आहे. हिंदू धर्मात हा सण साडेतीन मुहूर्तांपैकी एक मानला जातो. शास्त्रानुसार गुढी उभारल्यानंतर तिला गोडाधोडाचा नैवेद्य देखील दाखवला जातो.

गुढीपाडव्याच्या (Gudi Padwa) सणात चव चाखली जाते ती, श्रीखंड-पुरीची. हल्ली बाजारात श्रीखंडच्या अनेक चवी चाखायला मिळतात. सध्या आंब्याचा मौसम सुरु असल्यामुळे आपण आम्रखंडची देखील चव चाखू शकतो. जर तुम्हालाही घरच्या घरी स्वादिष्ट आणि ताजं श्रीखंड बनवायचे असेल तर रेसिपी (Recipe) पाहा.

1. साहित्य

• दही - १/२ कप

• वेलची पावडर - ¼ टीस्पून

• किसलेले जायफळ- चिमूटभर

• साखर - १/२ कप

• गरम दूध - १ चमचा

• केशर - १२ ते १५ काड्या

• काजू, बदाम आणि पिस्ता - २ चमचे

2. कृती

• श्रीखंड बनवण्यासाठी सगळ्यात आधी दही स्वच्छ कापडात घ्या, त्याला २ तास लटकवून ठेवा.दह्यात असणारे पाणी निघून जाईल.

• घट्ट झालेल्या दह्याच्या गोळ्याला भांड्यात काढून घ्या. साखर आणि वेलची मिक्सरमध्ये बारीक वाटून घ्या.

• दह्यात वाटलेली साखर, वेलची पूड घालून फेटून घ्या. त्यात काजू, बदाम आणि पिस्ता घाला.

• दुसऱ्या भांड्यात दूध आणि केशर मिसळा. तयार केशर दूध मिश्रणात घाला.

• चांगेल एकजीव झाल्यानंतर फ्रिजमध्ये सेट होण्यास ठेवा. तयार श्रीखंड पुरीसोबत चवीने खा.