जग कितीही पुढे गेलं आणि डिजीटलचं युग असलं तरी देखील विविध कामांमध्ये पेन लागतोच. लहान मुलं, विद्यार्थी आणि अगदी ऑफिसमध्ये काम करणारी मोठी माणसे सर्वांकडे पेन असतो. पेन वापरत असताना अनेकांना आपल्या खिशात पेन ठेवण्याची सवय असते. काहीवेळा पेन अचानक फुटतात. तेव्हा त्यातील शाई आपल्या कपड्यांना लागते.

शाई लागलेला शर्ट पुन्हा वापरता येत नाही, कारण शाईचा डाग त्यावर फार विचित्र दिसतो. आता कपड्यांवर धुळ, माती, चिख्खल असे डाग असल्यास ते घालवण्यासाठी घरातील महिला विविध ट्रिक्स वापरतात. डाग घालवण्यासाठी वेगवेगळ्या प्रकारचे सर्फ, निर्मा आणि साबण वापरला जातो. मात्र जर कपड्यांना शाईचा डाग लागला आणि शर्ट नवीन असेल तर तो डाग काढता काढता महिलांच्या नाकी नऊ येतात.

त्यामुळेच शर्टावरील किंवा अन्य कोणत्याही कापडावरील शाईचा डाग कसा काढायचा याच्या आम्ही काही टिप्स आणि ट्रिक्स शोधल्या आहेत. त्याचीच माहिती आज जाणून घेणार आहोत.

टूथपेस्ट

कपड्यांवर लागलेला शाईचा किंवा इंकचा डाग काढण्यासाठी तुम्ही टूथपेस्टचा वापर करू शकता. त्यासाठी टूथपेस्ट ज्या शर्टावर इंक लागली आहे तेथे अप्लाय करा. टूथपेस्ट तिथे किमान १० ते २० मिनिटे तशीच राहूद्या. टूथपेस्ट सुकल्यानंतर त्यावर सर्फ टाकून शर्ट धुवून घ्या. तुम्हाला ही स्टेप २ ते ३ वेळा तरी करावी लागेल. असे केल्याने हळूहळू डाग गायब होतील.

दूध

शाई लागलेला शर्ट किंवा तेवढा भाग दुधात रात्रभर भिजत ठेवा. सकाळी उठल्यावर हे दूध फेकून द्या आणि शर्टावर पाणी तसेच निर्मा पावडर टाकून धुवून घ्या. याने देखील शाईचा डाग जाण्यास मदत होते.

शेवींग क्रिम

पती वापरत असलेली शेवींग क्रिम त्यांच्याच शर्टावरील शाईचा डाग काढण्यासाठी रामबाण उपाय ठरेल. जेथे इंक लागली आहे तेथे शेवींग क्रिम लावून ठेवा. २० मिनिटांनी शर्ट घासून स्वच्छ धुवून घ्या. ही ट्रिक नक्की काम करेल.

लिंबू आणि मीठ

लिंबू आणि मीठ आनेक प्रकराच्या डागांवर काम करते. त्यामुळे कपड्यांवर जिथे शाई लागली आहे, तिथे आधी लिंबाचा रस पिळून घ्या. त्यानंतर त्यावर मीठ टाकून घ्या. मीठ आणि लिंबाचा रस यामुळे कापड स्वच्छ होण्यास मदत होते. लिंबामध्ये असलेले रासायनिक घटक कापडावरील डाग दूर करतात.