महाराष्ट्रातल्या स्वयंपाकघरात अनेक असे घटक आहेत जे फक्त चवीसाठीच नाही तर आरोग्यासाठीही फायदेशीर ठरतात. त्यामध्ये बडीशेप आणि मेथी हे दोन घटक अनेक वर्षांपासून घरगुती औषध म्हणून वापरले जात आहेत. पचन सुधारण्यासाठी, शरीरातले विषारी घटक बाहेर काढण्यासाठी आणि वजन नियंत्रणात ठेवण्यासाठी या दोन्ही घटकांचा वापर मोठ्या प्रमाणात केला जातो. पण प्रश्न असा पडतो शरीर डिटॉक्स आणि वजन कमी करण्यासाठी यापैकी कोणता घटक जास्त उपयोगी पडू शकतो.

बडीशेपचे पाणी

बडीशेपचे पाणी तयार करण्यासाठी बडीशेप रात्रभर पाण्यात भिजवून ठेवा किंवा थोडी उकळून तिचं पाणी गाळून घेऊ शकता. बडीशेपमध्ये अँटिऑक्सिडंट्स, फायबर असतात. हे पाणी पचन सुधारतं, गॅस आणि सूज कमी करतं तसेच शरीरातील जास्त फॅट आणि टॉक्सिन्स बाहेर काढण्यास मदत करतं. बडीशेपच्या पाण्यामुळे शरीरात थंडावा मिळतो आणि मेटाबॉलिझम वाढून वजन कमी होण्यास मदत होते. अनेक लोक सकाळी बडीशेप पाणी पिणं पसंत करतात कारण ते हलकं आणि ताजेतवाने वाटतं.

मेथीचे पाणी

मेथीचे पाणी बनवण्यासाठी मेथीचे दाणे रात्रभर पाण्यात भिजवा आणि सकाळी ते पाणी सेवन करा. यामध्ये भरपूर प्रमाणात फायबर, प्रोटीन आणि आयर्न असतात. मेथीचे पाणी पचन सुधारतं, शरीरातील अपायकारक घटक बाहेर काढून टाकतं, रक्तातील साखरेचं प्रमाण नियंत्रित ठेवतं आणि फॅट कमी करण्यात मदत करतं.

पचनासाठी काय जास्त फायदेशीर?

जर तुम्हाला वारंवार अॅसिडिटी, पोट फुगणे किंवा अपचनाचा त्रास होत असेल तर बडीशेपचे पाणी तुमच्यासाठी सर्वोत्तम आहे. यातील कार्मिनेटिव्ह गुणधर्म पचनास गती देतात आणि त्वरित आराम मिळतो. जर तुम्हाला बद्धकोष्ठतेचा किंवा संथ पचनाचा त्रास असेल, तर मेथीच्या दाण्यांचे पाणी जास्त उपयुक्त ठरतं कारण त्यातील फायबर आतड्यांची हालचाल सुधारतं.

टीप : वरील माहिती आम्ही फक्त वाचक-प्रेक्षकांपर्यंत पोहचवत आहोत. याचं समर्थन अथवा दावा करत नाही. त्यामुळे कोणतेही उपचार, डाएट आणि औषधं तज्ज्ञांच्या सल्ल्यानं घ्यावीत.