पनीरपासून बनवलेले पदार्थ बहुतांश लोकांना खायला आवडतात, परंतु बाजारातून पनीर खरेदी करताना त्यात भेसळ असण्याची भीती असते. पनीरमध्ये भेसळ झाल्यास त्याच्या गुणवत्तेवर आणि चवीवरही परिणाम होतो. अशा वेळी अनेकजण घरच्या घरीच पनीर खरे आहे की नकली हे तपासण्याचे मार्ग शोधतात. पण, पाण्याद्वारे खरंच पनीरमधील भेसळ ओळखता येते का? चला जाणून घ्या.

पनीरमधील भेसळ कशी ओळखायची?

पनीरचा पोत आणि सुगंध

ताजे पनीर सामान्यतः मऊ असते आणि त्याला दुधासारखा हलका सुगंध येतो. जर पनीरला दुर्गंधी येत असेल, त्याचा रंग बदलला असेल किंवा ते चिकट वाटत असेल, तर ते खरेदी करणे टाळा.

स्टार्चची भेसळ तपासणी

FSSAI नुसार, पनीरमधील स्टार्चची भेसळ तपासण्यासाठी आयोडीन चाचणी केली जाऊ शकते. यासाठी पनीरचा छोटा तुकडा पाण्यात उकळा आणि नंतर तो थंड होऊ द्या. त्यानंतर त्यात आयोडीनचे काही थेंब टाका. जर पनीरचा रंग निळा झाला, तर त्यात स्टार्च असण्याचा संशय बळावतो. लक्षात ठेवा, ही चाचणी फक्त स्टार्च ओळखण्यास मदत करते. यामुळे पनीरमध्ये इतर कोणत्याही गोष्टीची भेसळ नाही हे सिद्ध होत नाही.

पॅकेटबंद पनीर खरेदी करताना लेबल तपासा

जर तुम्ही पॅकेटबंद पनीर खरेदी करत असाल, तर त्याची पॅकिंग, उत्पादनाची तारीख आणि एक्सपायरी डेट आवर्जून तपासा. पॅकेटवर लिहिलेली साहित्याची माहितीही वाचा. पॅकेट फुगलेले, फाटलेले किंवा नीट बंद केलेले नसेल तर ते खरेदी करू नका.

पनीरमधील भेसळ कशी नक्की कळेल?

घरच्या घरी केले जाणारे हे उपाय सर्व प्रकारच्या भेसळीची माहिती देऊ शकत नाहीत. आयोडीन टेस्ट फक्त स्टार्चबद्दल संकेत देते. पनीरमध्ये इतर काही मिसळले आहे की नाही, हे अचूकपणे ओळखण्यासाठी लॅबमध्ये चाचणी करावी लागते. त्यामुळे पुढच्या वेळी फक्त पनीर पाण्यात टाकून ते अस्सल किंवा नक्कल ठरवू नका

या गोष्टी लक्षात ठेवा

• पनीर नेहमी स्वच्छ आणि विश्वासू दुकानातूनच खरेदी करा.

• उघडे पनीर जास्त वेळ बाहेर ठेवलेले घेऊ नका आणि घरी आणल्यानंतर ते फ्रिजमध्ये ठेवा.

• जर पनीरला खराब वास येत असेल किंवा त्याचा पोत असामान्य वाटत असेल, तर त्याचे सेवन टाळा.

लक्षात ठेवा, पाण्यात टाकून पनीरची शुद्धता खात्रीशीरपणे ओळखता येत नाही. त्यामुळे कोणत्याही एका घरगुती टेस्टवर अंधपणे विश्वास ठेवण्याऐवजी त्याची पॅकिंग, ताजेपणा आणि खरेदी करण्याच्या ठिकाणाचीही योग्य माहिती घ्या.