स्कुटी किंवा बाईक चालवताना हेल्मेट घालणं गरजेचं आहे. मात्र अनेकांच्या मनात शंका असते की हेल्मेट किंवा टोपी वापरल्याने केस गळतात का? खास करून ज्या व्यक्ती नियमितपणे बाईक चालवतात किंवा उन्हापासून बचावासाठी टोपी घालतात, त्यांना ही भीती अधिक सतावते. खरंच हेल्मेटमुळे केस गळतात का? चला यामागचं खरं कारण जाणून घेऊया.

हेल्मेट आणि टोपी खरंच केस गळण्याचं कारण आहे का?

हेल्मेट किंवा टोपी घालणं हे थेट केस गळण्याचं कारण नसतं. मात्र, जर हे दीर्घकाळ चुकीच्या पद्धतीने वापरलं गेलं, तर त्यामुळे केसांना हानी पोहोचू शकते. विशेषतः खूप टाइट हेल्मेट किंवा टोपी वापरल्यास, हवेशीरपणा कमी होतो.

असं केल्याने डोक्याला आणि स्कॅल्पला घाम येतो. शिवाय ते डोक्याच्या त्वचेशी घासलं जातं आणि केसांच्या मुळांवर ताण येतो. यामुळे केस तुटणं किंवा गळणं याची शक्यता वाढते.

केस गळण्यामागचं खरं कारण

ज्यावेळी आपण घट्ट हेल्मेट किंवा टोपी वापरतो त्यावेळी टाळूला पुरेशी हवा मिळत नाही. त्यामुळे टाळूत घाम साचू लागतो आणि केसांच्या मुळांना हानी पोहोचते. सततची ओलसरपणा आणि उष्णता यामुळे बुरशीजन्य संसर्ग होऊ शकतो. त्यामुळे कोंडा, खाज आणि केस गळणं अशा समस्या उद्भवतात.

स्वच्छता आणि योग्य आकार महत्त्वाचा

जर तुम्ही रोज किंवा दीर्घकाळासाठी हेल्मेट किंवा टोपी वापरत असाल तर त्याची स्वच्छता राखणं खूप आवश्यक आहे. वेळोवेळी त्यांना स्वच्छ धुवावं. त्याचप्रमाणे योग्य साइजची काळजी घ्यावी. फार टाइट हेल्मेट किंवा टोपी घातल्यास टाळूवर अतिरिक्त दाब येतो, ज्याचा परिणाम केसांच्या आरोग्यावर होतो.

डिस्क्लेमर : वरील माहिती आम्ही फक्त वाचक-प्रेक्षकांना देत आहोत. आम्ही याचं समर्थन अथवा दावा करत नाही. कोणतेही उपचार, डाएट आणि औषधं तज्ज्ञांच्या सल्ल्यानंच घ्यावीत.