डोकेदुखी हा सामान्य वाटणारा त्रास असला तरी, काही वेळेस ही वेदना गंभीर आरोग्य समस्यांची सूचक ठरू शकते. डोकेदुखीचा त्रास जाणवू लागला की आपण झोप, मसाज किंवा औषध घेतो. पण जर तरीही डोकेदुखीचा त्रास कमी होत नसेल तर, ही चिंतेची बाब असू शकते. कधीकधी ही डोकेदुखी गंभीर आजारांना सूचित करते. जर आपल्याला डोकेदुखीसह काही गोष्टींचा अधिक त्रास जाणवत असेल, तर आपल्याला गंभीर आजारांचा धोका असू शकतो. त्यामुळे तातडने तज्ज्ञांचा सल्ला किंवा डॉक्टरांना पाचारण करणे गरजेचं आहे.

डोकेदुखीमागे ६ कारणे:

ब्रेन ट्यूमर

जर सकाळी डोकेदुखीचा त्रास होत असेल यासह उलट्या आणि मळमळ याचाही त्रास होत असेल तर, ही ब्रेन ट्यूमरची लक्षणे आहेत. ब्रेन ट्यूमरमध्ये दृष्टी देखील अंधुक होते. जर आपल्याला डोकेदुखीसह या समस्याही छळत असतील, तर वेळीच डॉक्टरांचा सल्ला घ्यावा.

मायग्रेन

जर डोकेदुखीसोबत प्रखर प्रकाश, मोठा आवाज किंवा तीव्र वासाचा त्रास होत असेल, तर आपल्याला कदाचित मायग्रेनचा त्रास असू शकतो. एक किंवा दोन तासांना आपल्याला याचा त्रास जाणवू होऊ शकतो.

उच्च रक्तदाब

वारंवार डोकेदुखी, विशेषत: सकाळी उठल्यावर डोकं दुखत असेल, तर हे उच्च रक्तदाबाचे लक्षण असू शकते. जर आपली दृष्टी अंधुक होत असेल किंवा मानेमध्ये जडपणा जाणवत असेल तर, तातडीने रक्तदाब तपासा.

सायनस इन्फेक्शन

नाक बंद होणे, कपाळावर किंवा गालावर दाब जाणवणे आणि डोकेदुखी वाढणे ही सर्व सायनसची लक्षणे आहेत. अॅलर्जी आणि हवमानातील बदलामुळे ही समस्या अधिक वाढते.

डोळ्यांची कमजोरी

बराच वेळ स्क्रीन पाहिल्यानंतर किंवा वाचल्यानंतर डोकेदुखी, चिडचिड किंवा दृष्टी अंधुक होणे या गोष्टी दृष्टी कमकुवत असल्याचे दर्शवते.

ताण आणि चिंता

ताण, चिंता किंवा नैराश्याचा थेट परिणाम डोकेदुखीच्या स्वरूपात दिसून येतो. याचा त्रास आपल्याला दररोज होऊ शकतो. विशेषत: सायंकाळच्या सुमारास संपूर्ण डोकं जड होतं. जर आपल्यालाही याचा त्रास होत असेल तर, कदाचित स्ट्रेसमुळे डोकेदुखीचा त्रास जाणवू शकतो.