• ब्रेस्टचा अचानक बदल कॅन्सरचे लक्षण असू शकतो

• गाठ, सूज, त्वचेतील बदल दुर्लक्षित करू नयेत

• निप्पलमधून स्त्राव किंवा रक्त येणे गंभीर

महिलांमध्ये ब्रेस्टच्या आकारात होणाऱ्या बदलासाठी सामान्यतः हार्मोनल बदल, वजनातील फरक किंवा मासिक पाळीला कारणीभूत मानलं जातं. जर हा बदल अचानक आणि कोणत्याही स्पष्ट कारणाशिवाय होत असेल, तर त्याकडे दुर्लक्ष करणं तुमच्यासाठी धोकादायक ठरू शकतं. वैद्यकीय तज्ज्ञांच्या सांगण्यानुसार, अशा प्रकारचा बदल ब्रेस्ट कॅन्सरच्या सुरुवातीच्या लक्षणांपैकी एक असू शकतो.

स्तनाच्या आकारात बदल का होतो?

ब्रेस्ट टिश्यू हे हार्मोन्स, फॅट आणि मसल्सपासून बनलेले असतात. मासिक पाळीच्या काळात किंवा गर्भधारणेदरम्यान हार्मोनल बदलांमुळे ब्रेस्टच्या आकारात थोडाफार बदल होऊ शकतो. पण जर एका बाजूच्या ब्रेस्टमध्ये स्पष्ट बदल दिसत असतील जसं की गाठ, सूज किंवा त्वचेवर काही बदल तर हे चिंतेचं कारण असू शकतं. Mayo Clinic च्या माहितीनुसार, ब्रेस्टच्या आकार, रचना किंवा दिसण्यात होणारा बदल ब्रेस्ट कॅन्सरचं संभाव्य लक्षण असू शकतं.

जागतिक आरोग्य संघटनेच्या अहवालानुसारही, ब्रेस्टचा आकार, शेप किंवा दिसण्यामध्ये होणारा बदल हा ब्रेस्ट कॅन्सरचा प्रारंभिक संकेत असू शकतो. Agendia या वैद्यकीय संस्थेने देखील स्पष्ट केलंय की, ब्रेस्ट कॅन्सरच्या सुरुवातीच्या टप्प्यात असमान आकार किंवा रचना हा ट्यूमरमुळे होणारा महत्त्वाचा इशारा असतो.

स्तनांच्या कोणत्या बदलांकडे दुर्लक्ष करू नये?

• एका ब्रेस्टचा आकार अचानक वाढणं

• ब्रेस्टच्या त्वचेवर सुरकुत्या दिसणं

• निप्पलचा आकार बदलणं किंवा आत वळणं

• ब्रेस्टमध्ये जळजळ, वेदना किंवा सतत सूज येणं

• निप्पलमधून कारण नसताना स्त्राव किंवा रक्त येणं

हे बदल काही वेळा सिस्ट किंवा हार्मोनल असंतुलनामुळेही होऊ शकतात. परंतु, जर ही लक्षणं काही आठवड्यांपर्यंत कायम राहिली तर त्वरित डॉक्टरांकडे तपासणी करणं अत्यावश्यक आहे.

ब्रेस्ट कॅन्सरपासून बचावाचे उपाय

• महिलांनी ४० वर्षांनंतर दरवर्षी मॅमोग्राफी करून घ्यावी.

• जर कुटुंबात कोणाला ब्रेस्ट कॅन्सर झाला असेल तर ३० वर्षांनंतरच तपासणी सुरू करावी.

• दर महिन्याला स्वतःची तपासणी करावी. गाठ, आकार किंवा रचनेत बदल दिसल्यास त्वरित डॉक्टरांचा सल्ला घ्यावा.

• जीवनशैलीत बदल करूनही ब्रेस्ट कॅन्सरचा धोका कमी करता येतो.

• आहारात हिरव्या भाज्या, फळं, साबूत धान्य आणि फायबरयुक्त आहार यामुळे ब्रेस्ट कॅन्सरचा धोका कमी होतो.

डिस्क्लेमर : वरील माहिती आम्ही फक्त वाचक-प्रेक्षकांना देत आहोत. आम्ही याचं समर्थन अथवा दावा करत नाही. कोणतेही उपचार, डाएट आणि औषधं तज्ज्ञांच्या सल्ल्यानंच घ्यावीत.