Cancer Symptoms : शरीरातील या दुखण्यांना दुर्लक्षित करतांय? असू शकतं कर्करोगाचं लक्षण, आत्ताच सावध व्हा

आपल्या शरीरातील काही भाग नेहमी दुखत असतात. याची अनेक कारणं असू शकतात जसं की वात, हाडांची कमकुवतता, गॅसच्या समस्येमुळे छातीत दुखणे, पोटात दुखणे, पाठीत किंवा कमरेत दुखणे. हे दुखणे साधारण असले तरी, असे वारंवार होत असले आणि या दुखण्यामुळे रात्री झोपही लागत नसेल तर ते दुर्लक्षित करणे तुम्हाला महागात पडू शकते. डॉक्टरांच्या मते शरीरात वारंवार तीव्र दुखणे जाणवत असेल तर हे कर्करोगाचे लक्षण असू शकते. चला तर मग जाणून घेऊया सविस्तर माहिती.

पाठीचे दुखणे ही एक सामान्य समस्या आहे. ऑफिसमध्ये काम करताना तासन् तास एका ठिकाणी बसून काम करावे लागते, जड वस्तू उचलणे किंवा गृहीणींना करावी लागणारी घरातली कामे यामुळे पाठ किंवा कंबर दुखणे साहजिक आहे. पण हे दुखणे अतिशय तीव्र असेल व काही केल्या कमी होत नसेल तर, तुम्हाला पॅंक्रियाटीक कर्करोग, छातीचा, फुफ्फुसांचा किंवा किडनीचा कर्करोग असण्याची शक्यता आहे.

बऱ्याचवेळा गॅसच्या समस्येमुळे पोटात दुखते. अतिप्रमाणात जंक फूड खाल्ल्याने, गरजेपेक्षा जास्त जेवल्याने, पोट साफ न झाल्याने किंवा चुकीच्या खाण्यामुळे पोटात दुखण्याच्या समस्या उद्भवतात. पण हे दुखणे दिर्घकाळ राहत असेल आणि काळासह वाढत असेल तर ते काळजीचे कारण आहे. असे झाल्यास लिवरच्या आरोग्यास धोका असल्याचे समजते. जर तुमच्या पोटाचे दुखणे सामान्य नसून न थांबणारे असेल तर हे ओवेरियन, कोलन सारख्या कर्करोगाचे लक्षण आहे.

छतीत दुखण्याचे कारण गॅसची समस्या किंवा हृदयविकाराचा झटका समजले जाते. पण छातीची तपासणी केल्यानंतर सुद्धा छातीत ताण आणि जडपणा जाणवत असेल तर, हे फुफ्फुसांच्या कर्करोगाचे लक्षण असू शकते. तुमच्या शरीरातील कोणत्याही भागाचे दुखणे जास्तीत जास्त २-३ आठवड्यापासुन असल्यास दुर्लक्ष न करता लगेचच डॉक्टरांना भेट द्या. आपले शरीर एक अलार्म आहे जो स्वत:च त्याला होत असलेल्या समस्यांचे संकेत देत असतो. म्हणूनच हे संकेत ओळखून त्यावर त्वरीत उपचार करणे आवश्यक आहे.

टीप : वरील माहिती आम्ही फक्त वाचक-प्रेक्षकांपर्यंत पोहचवत आहोत. याचं समर्थन अथवा दावा करत नाही. त्यामुळे कोणतेही उपचार, डाएट आणि औषधं तज्ज्ञांच्या सल्ल्यानं घ्यावीत.