कॅनडामधील शास्त्रज्ञांनी नुकतंच एका आश्चर्यचकित करणारा शोध लावला आहे. ओंटारियो प्रांतातील किड क्रीक खाणीत त्यांना पृथ्वीवरील सर्वात जुनं पाणी मिळालं होतं. हे पाणी तब्बल २०० कोटी वर्षांपेक्षा जुनं असल्याचं सांगितलं जातंय. या २०० कोटी वर्षांपेक्षा जुन्या असलेल्या पाण्याचा स्वाद त्यांनी घेतला आहे.

पाणी नेमकं कुठे आणि किती खोल सापडलं?

हे प्राचीन पाणी खाणीच्या जवळपास ३ किलोमीटर खोल जमिनीत मिळालं. आतापर्यंत जगात ज्या ठिकाणी जुनं पाणी सापडले होतं, त्यापेक्षा हे पाणी खूपच जुनं आहे. प्रोफेसर बार्बरा शेरवुड लोलर आणि त्यांच्या टीमने हे पाणी किती जुनं आहे हे ठरवण्यासाठी आयसोटोपिक अॅनालिसिस नावाची वैज्ञानिक पद्धत वापरली.

आश्चर्याची बाब म्हणजे हे पाणी इतक्या वर्षांपासून जमिनीत राहिलं होतं की त्यावर बाहेरील वातावरणाचा काहीच परिणाम झाला नाही. या संशोधनाबद्दलची माहिती नेचर कम्युनिकेशन्स या प्रसिद्ध वैज्ञानिक जर्नलमध्ये प्रकाशित करण्यात आली आहे.

या शोधाचा वैज्ञानिक दृष्टीने काय अर्थ?

या पाण्यामुळे पृथ्वीच्या सुरुवातीच्या काळाबद्दल नवी माहिती मिळण्याची शक्यता आहे. पाण्यात सूर्यप्रकाश पोहोचला नव्हता, तरीसुद्धा सूक्ष्मजीवांनी तग धरून जगण्याची शक्यता असल्याचं शास्त्रज्ञ मानतात. या पाण्यात मीठाचे प्रमाण खूपच जास्त होतं. त्यामुळे ते पाणी प्रचंड खारट आणि कडू होतं. प्रा. बार्बरा यांनी स्वतः हे पाणी चाखून याबद्दल सांगितलं. मीठाचं जास्त प्रमाण आपल्याला त्या काळातील वातावरणाची झलक दाखवते.

यामुळे कोणती रहस्य उलगडणार आहेत?

कॅनडातील या शोधामुळे पृथ्वीवर जीवन कसं सुरू झालं, सूक्ष्मजीव किती काळ तग धरू शकतात आणि इतर ग्रहांवरही जीवन असण्याची शक्यता किती आहे, याबाबत नव्या गोष्टी समजण्यास मदत होणार आहे.

हा शोध आपल्याला आठवण करून देतो की, आपली धरती अजूनही किती गूढ आणि रहस्यमयी आहे. अनेक रहस्यं अजूनही जमिनीखाली लपलेली आहेत आणि ती उलगडण्याची वाट पाहत आहेत.