आंब्याचा सिझन सुरु झाला आहे आणि मार्केटमध्ये आता फळ विक्रेत्यांकडे आंबे पाहायला मिळतायत. जवळपास प्रत्येकाला आंबा खायला आवडतो. मात्र मधुमेही रूग्णांच्या मनात एक प्रश्न असतो की, आंबा खावा की नाही.

आंब्यामध्ये नैसर्गिक साखरेचं प्रमाण जास्त असतं. ज्यामुळे रक्तातील साखरेची पातळी वाढण्याचा धोका असतो. पीएसआरआय हॉस्पिटलच्या आहारशास्त्र विभागाच्या प्रमुख शालिनी ब्लिस यांनी इंडिया टीव्ही या वेबसाईटला मधुमेहींनी आंबे खावेत की नाही, आणि जर खावेत तर त्यांनी दिवसाला किती खावेत याबाबत माहिती दिलीये.

मर्यादित प्रमाणात करावं सेवन

शालिनी ब्लिस यांच्या मते, असं नाही की मधुमेही रूग्णांनी आंबे खाऊच नयेत. ज्या व्यक्तींना मधुमेह आहे त्यांनी आंबे खाण्याचं योग्य प्रमाण आणि वेळ याकडे लक्ष देणं गरजेचं आहे. आंब्यामध्ये फायबर, व्हिटॅमिन ए आणि व्हिटॅमिन सी यांच्यासारखे पोषक तत्वं देखील असतात. या गोष्टी आपल्या शरीरासाठी फायदेशीर असतात. आंब्यामध्ये असलेली फ्रुक्टोज साखर ब्लड शुगर वेगाने वाढवू शकतात. त्यामुळे त्यांचं सेवन मर्यादित प्रमाणातच केलं पाहिजे.

एका दिवसात किती आंबे खाल्ले पाहिजेत?

मधुमेहींनी एकाच वेळी जास्त आंबे खाणं टाळावं. तुमची साखरेची पातळी नियंत्रणात असेल तर दिवसातून अर्धा किंवा एक लहान आंबा खाणं सुरक्षित मानलं जातं. आंबे खाण्याची सर्वोत्तम वेळ दुपारची असतं. त्यामुळे तुम्ही जेवणानंतर आंबा खाऊ शकता. अशावेळी शरीर ते सहज पचवू शकेल आणि साखरेचा प्रभाव कमी होईल.

आंबा खाल्ल्यानंतर हे पदार्थ चुकूनही खाऊ नयेत

आंबे खाल्ल्यानंतर इतर गोड पदार्थ खाणं टाळलं पाहिजे. त्याचप्रमाणे जर तुम्ही आंबे खात असाल तर त्या दिवशी कार्ब्सचं सेवन मर्यादित ठेवा. आमरस किंवा शेक घेणं टाळलं पाहिजे. कारण त्यामध्ये फायबरचं प्रमाण कमी आणि साखरेचं प्रमाण जास्त असतं.