लो-डेंसिटी लिपोप्रोटीन कोलेस्ट्रॉल म्हणजेच शरीरातील खराब कोलेस्ट्रॉलची पातळी वाढणं आरोग्यासाठी खूप धोकादायक ठरू शकतं. याला 'वाईट कोलेस्ट्रॉल' असंही म्हणतात कारण ते नसांमध्ये जमा होतं आणि शरीराच्या कार्यात अडथळा निर्माण करतं. यामुळे हृदयरोग, स्ट्रोक आणि पेरिफेरल आर्टरीचे आजार (पीएडी) सारख्या गंभीर आजारांचा रूग्णांना सामना करावा लागू शकतो.

तज्ज्ञांच्या म्हणण्याप्रमाणे, ज्यावेळी शरीरात वाईट म्हणजेच एलडीएल कोलेस्ट्रॉलची पातळी वाढते तेव्हा त्याची लक्षणं चालताना किंवा शारीरिक हालचालींदरम्यान दिसून येतात. त्यामुळे अशा लोकांकडे दुर्लक्ष केल्यास ते महागात पडू शकतं.

पेरिफेरल आर्टरी डिसीजमुळे पाय आणि हातांमध्ये रक्तप्रवाह रोखला जातो. यामुळे व्यक्तीला चालताना वेदना, मुंग्या येणं किंवा थंडी वाजण्याची समस्या जाणवू शकते. जर ही समस्या वेळीच हाताळली नाही तर परिस्थिती गंभीर होण्याचा धोका असतो. वाढलेल्या एलडीएल कोलेस्ट्रॉलची काही लक्षणं जी चालताना दिसतात ती पाहूयात.

इंटरमिटेंट क्लॉडिकेशन (Intermittent Claudication)

पेरिफेरल आर्टरी डिसीजचं सर्वात सामान्य लक्षण म्हणजं इंटरमिटेंट क्लॉडिकेशन. यामध्ये, चालताना किंवा पायऱ्या चढताना व्यक्तीला पायात क्रॅम्प्स येण्याचा धोका जाणवतो. यावेळी स्नायूंमध्ये वेदना जाणवू लागतात. थांबल्यानंतर ही वेदना कमी होतात, परंतु पुन्हा चालताना पुन्हा येऊ शकते.

पायांमध्ये वेदना होणं

वाढलेल्या कोलेस्ट्रॉलचं आणखी एक लक्षण म्हणजे पायांमध्ये वेदना होणं किंवा जडपणा. यावेळी रूग्णाला पोटात, मांडीमध्ये किंवा कंबरेमध्ये वेदना जाणवू शकतात. ही समस्या हळूहळू गंभीर होऊ लागते.

पाय अचानक थंड पडणं

चालताना किंवा शारीरिक हालचाली करताना जर तुम्हाला तुमच्या पायांमध्ये किंवा घोट्यांमध्ये थंडपणा जाणवत असेल तर त्याकडे दुर्लक्ष करू नका. हे वाईट कोलेस्ट्रॉलमुळे शिरा अरुंद झाल्या असल्याचं लक्षणं आहे. तसंच यामुळे रक्तप्रवाहावर परिणाम होतो. यावेळी पायांचा रंग निळा किंवा पिवळा देखील होऊ शकतो.

मुंग्या येणं

चालताना पायांमध्ये मुंग्या येणं किंवा पाय सुन्न होणं हे देखील एलडीएल कोलेस्ट्रॉल वाढल्याचं लक्षण असू शकतं. ज्यावेळी शरीरात रक्ताभिसरण योग्यरित्या होत नाही, ज्यामुळे नसांना पुरेसा ऑक्सिजन मिळत नाही तेव्हा अशी परिस्थिती उद्भवू लागते.

टीप : वरील माहिती आम्ही फक्त वाचक-प्रेक्षकांपर्यंत पोहचवत आहोत. याचं समर्थन अथवा दावा करत नाही. त्यामुळे कोणतेही उपचार, डाएट आणि औषधं तज्ज्ञांच्या सल्ल्यानं घ्यावीत.