19 सप्टेंबर 2025 ला प्रसिद्ध गायक झुबीन गर्ग (Zubeen Garg Death Case ) यांचे निधन झाले. वयाच्या 52 व्या वर्षी त्यांनी अखेरचा श्वास घेतला. सिंगापूरमध्ये स्कूबा डायव्हिंग करत असताना त्यांचा अपघात झाला. जेव्हा त्यांना रुग्णालयात दाखल केले. तेव्हा उपचारादरम्यान त्यांचा मृत्यू झाला. आता या प्रकरणात मोठी अपडेट समोर आली आहे.

झुबीन गर्ग यांच्या मृत्यू प्रकरणी पोलीस चौकशी करत आहेत. अशात आता झुबीन गर्ग यांचे मॅनेजर सिद्धार्थ शर्मा आणि सिंगापूर महोत्सवाचे आयोजक यांना दिल्ली येथे अटक करण्यात आली आहे. अटकेनंतर दोघांनाही गुवाहाटीला नेण्यात आले. पोलिसांनी सांगितले की, झुबीन गर्ग यांचे व्यवस्थापक आणि महोत्सव आयोजक यांची चौकशी सुरू आहे.

महोत्सवाच्या आयोजकांना सिंगापूरहून नवी दिल्लीच्या इंदिरा गांधी आंतरराष्ट्रीय विमानतळावर पोहोचताच अटक करण्यात आली. तर मॅनेजर सिद्धार्थ शर्मा यांना गुरुग्राममधील एका अपार्टमेंटमधून अटक करण्यात आली. पोलीसांनी आतापर्यंत अनेक लोकांचे जबाब नोंदवले आहेत.

झुबीन गर्ग

प्रसिद्ध गायक झुबीन गर्ग यांचा जन्म मेघालयामध्ये 1972 मध्ये झाला. त्यांनी अनेक सुपरहिट गाणी गायली आहेत. त्यांचे खरे नाव जिबोन बोरठाकूर असे होते. 2006 साली रिलीज झालेल्या 'गँगस्टर' चित्रपटातील 'या अली' हे गाणे झुबीन गर्ग यांनी गायले. 'गँगस्टर' चित्रपटात इमरान हाश्मी आणि कंगना राणौत मुख्य भूमिकेत होते. झुबीन गर्ग यांनी आसामी, बंगाली, हिंदी अशा विविध भाषांमध्ये गाणी गायली आहेत.