Zee Marathi Serial:

'झी मराठी' (Zee Marathi) वाहिनीवरील प्रेक्षकांच्या आवडती आणखी एक मालिका निरोप घेणार आहे. ‘दार उघड बये’ ही मालिका लवकरच बंद होणार आहे. याच आठवड्यामध्ये ही मालिका प्रेक्षकांचा निरोप घेणार आहे. या मालिकेने अल्पावधितच प्रेक्षकांची मनं जिंकली. या मालिकेतील प्रत्येक पात्र प्रेक्षकांच्या पसंतीस उतरले. मालिकेच्या सेटवरचा एक व्हिडीओ नुकताच समोर आला आहे. ज्यामध्ये मालिकेच्या सेटवरील शूटिंगच्या शेवटच्या दिवसांचे क्षण दाखवण्यात आले आहेत.

‘दार उघड बये’ मालिकेमध्ये मुक्ता हे पात्र साकारणारी अभिनेत्री सानिया चौधरीने नुकताच आपल्या अधिकृत इन्स्टाग्राम अकाऊंटवरून एक व्हिडीओ शेअर केला आहे. मालिकेच्या सेटवरचा हा व्हिडीओ आहे. या व्हिडीओमध्ये मालिकेतील प्रत्येक पात्र, शूटिंग करतानाची मजा-मस्ती, एकमेकांशी संवाद साधतानाचे क्षण, शूटिंग करतानाचे क्षण, शूटिंगदरम्यान सेटवर असणारी गडबड हे दाखविण्यात आले आहेत.

हा व्हिडीओ शेअर करत सानियाने कॅप्शनमध्ये असे लिहीले आहे की, 'प्रेम, हास्य अन् अविस्मरणीय आठवणींनी भरलेलं हे वर्ष. या मालिकेसाठी आणि ऑफस्क्रीन कुटुंबासाठी अत्यंत कृतज्ञ आहे. आमच्या शूटिंगच्या शेवटच्या दिवसांतील काही क्षण... ‘दार उघड बये’ पाहत राहा दुपारी २ वाजता' सानियाच्या या इन्स्टा पोस्टनंतर तिच्या चाहत्यांनी कमेंट्समध्ये हर्ट इमोजी पोस्ट करत प्रेम व्यक्त केले आहे.

‘दार उघड बये’ ही मालिका १९ सप्टेंबर २०२२ रोजी प्रेक्षकांच्या भेटीला आली होती. या मालिकेने काही वेळातच प्रेक्षकांच्या मनामध्ये घर केलं होतं. आतापर्यंत या मालिकेचे ३०० पेक्षा जास्त एपिसोड झाले आहेत. ही मालिका येत्या ७ ऑक्टोबरला प्रेक्षकांचा निरोप घेणार असून या दिवशी शेवटचा भाग प्रसारित केला जाणार आहे. ही मालिका निरोप घेणार असल्याचे कळताच प्रेक्षक नाराज झाले आहेत.

‘दार उघड बये’ या मालिकेमध्ये सानिया चौधरी, रोशन विचारे, शरद पोंक्षे, सुहास परांजपे, किशोरी आंबिये आणि रुचिरा जाधव हे कलाकार मुख्य भूमिकेत आहेत. या सर्व कलाकारांनी या मालिकेच्या माध्यमातून प्रेक्षकांचे मनोरंजन केले. प्रेक्षकांनी देखील त्यांच्यावर भरभरून प्रेम केले. ही मालिका संपल्यानंतर रोशन विचारे आता नव्या मालिकेतून प्रेक्षकांच्या भेटीस येण्यासाठी सज्ज झाला आहे. ‘सोनी मराठी’वरील नवी मालिका ‘खरंच तिचं काय चुकलं?’ या मालिकेमध्ये तो काम करताना दिसणार आहे.