Akshay Kumar : बॉलिवूडचा 'खिलाडी' अक्षय कुमार पुन्हा एकदा चर्चेत आला आहे. मात्र यावेळी कारण त्याचा आगामी चित्रपट नसून, मुंबईतील त्याच्या लक्झरी फ्लॅटचा व्यवहार आहे. अक्षय कुमारने मुंबईतील मुलुंड पश्चिम परिसरातील दोन आलिशान फ्लॅट विकले असून, यामुळे त्याला एकूण १२.३८ कोटी रुपयांचा फायदा झाला आहे.

मिळालेल्या माहितीनुसार, हे दोन्ही फ्लॅट मुलुंड पश्चिम येथील ओबेरॉय एनिग्मामध्ये आहेत. दोन्ही फ्लॅट टॉवर 'बी'च्या १८व्या मजल्यावर असून प्रत्येक फ्लॅटचे कार्पेट क्षेत्रफळ सुमारे १,८८६ चौरस फूट आहे. प्रत्येक फ्लॅटची विक्री ६.१९ कोटी रुपयांना झाली असून, दोन्ही व्यवहारांची एकत्रित किंमत १२.३८ कोटी रुपये इतकी आहे. या फ्लॅटसोबत प्रत्येकी तीन कार पार्किंगची सुविधाही देण्यात आली आहे.

विशेष म्हणजे, अक्षय कुमारने हे फ्लॅट २०१७ मध्ये सुमारे ९ कोटी रुपयांना खरेदी केले होते. जवळपास नऊ वर्षांनंतर झालेल्या या व्यवहारातून त्याला सुमारे ३.३८ कोटी रुपयांचा नफा मिळाला आहे.

याआधीही अक्षय कुमारने मुंबईतील इतर प्रोपर्टीचे व्यवहार करून चांगला नफा मिळवला होता. त्यामुळे तो चित्रपटांप्रमाणेच रिअल इस्टेट गुंतवणुकीतही मोठी कमाई करणारा अभिनेता म्हणून ओळखला जातो. योग्य वेळी गुंतवणूक करून योग्य वेळी विक्री करण्याच्या त्याच्या रणनीतीची चर्चा आता पुन्हा सुरू झाली आहे.

वर्कफ्रंटबाबत बोलायचे झाल्यास, अक्षय कुमारचा बहुप्रतीक्षित 'वेलकम टू द जंगल' प्रेक्षकांच्या भेटीला आला आहे. या चित्रपटात त्याच्यासोबत अनेक लोकप्रिय कलाकार आहेत. यामध्ये सुनील दत्त, अर्शद वारसी, परेश रावल, रवीना टंडन, दिशा पाटनी यांसारखे कलाकार महत्वाच्या भूमिकेत आहेत.