'वीण दोघांतली ही तुटेना' मालिकेला प्रेक्षक भरभरून प्रेम करताना दिसत आहेत. मालिकेतील समर-स्वानंदीची जोडी लोकांना खूप आवडते. तेजश्री प्रधान आणि सुबोध भावे यांच्या केमिस्ट्रीचे सर्वत्र कौतुक होताना दिसते. अलिकडेच या मालिकेत 'कुलवधू' फेम अभिनेत्री पूर्वा गोखलेची एन्ट्री झाली आहे. तिने मालिकेत समरची जुनी मैत्रीण किमया हे पात्र साकारले आहे.

किमया समर आणि स्वानंदीच्या आयुष्यात एक वादळ बनून येते. किमयाच्या येण्याने स्वानंदीला धक्का बसतो कारण किमया समरची एक्स गर्लफ्रेंड आणि जवळची मैत्रीण असते. किमया आल्यामुळे स्वानंदीला समरवरच्या प्रेमाची जाणीव होते आणि समरला देखील स्वानंदीची मैत्री आणि प्रेम समजते. मात्र आता किमया या पात्राची मालिकेतून एक्झिट होत आहे, म्हणजेच अभिनेत्री पूर्वा गोखलेने मालिकेला निरोप दिला आहे. तिने सोशल मीडियावर एक पोस्ट शेअर करून ही माहिती दिली आहे.

पूर्वा गोखले पोस्ट

"किमाया...ती एखाद्या वादळासारखी आली आणि मग हळूच स्थिरावली. यावेळी मात्र प्रत्येकानेच या वादळाचा आणि त्यासोबत आलेल्या धामधुमीचा मनमुराद आनंद लुटला...अवघ्या १५ दिवसांच्या या 'अतिथी-भेटीने' माझ्यावर अमाप प्रेम, आदर, आपुलकी आणि कौतुकाचा वर्षाव केला आहे... मी अत्यंत ऋणी आणि कृतज्ञ आहे..."

सुबोध भावे आणि पूर्वा गोखले 'कुलवधू' मालिकेत एकत्र काम केले आहे. पूर्वा गोखलेच्या पोस्टवर चाहते आणि कलाकार मंडळीं कमेंट्स करून तिच्यासाठीचे प्रेम व्यक्त केले आहे. 'वीण दोघांतली ही तुटेना' च्या टीमने सेटवर केक कापून पूर्वाला निरोप दिला. पूर्वा गोखलेने सेटवरील छान फोटो शेअर केले आहेत. आता किमाया नावाचे वादळ गेल्यानंतर समर-स्वानंदीचे नात कोणते वळण घेणार हे पाहणे महत्त्वाचे ठरणार आहे.