सध्या अहमदाबादमध्ये झालेल्या विमान अपघातामुळे देशभरात चिंताजनक वातावरण पाहायला मिळत आहे. सर्वसामान्यांपासून ते कलाकारांपर्यंत सर्वजण यावर आपली प्रतिक्रिया देत आहेत. अशात आता टीव्ही अभिनेत्री रीम शेखचा (Reem Shaikh Viral Video) एक व्हिडीओ व्हायरल होत आहे. व्हायरल होणाऱ्या व्हिडीओमध्ये तिने केलेल्या कृतीने ती सध्या नेटकऱ्यांकडून चांगली ट्रोल होत आहे.

रीम शेख विमान अपघातानंतर 'लाफ्टर शेफ्स 2' च्या सेटबाहेर स्पॉट झाली. तेव्हा तिने पापाराझींशी संवाद साधला. तेव्हा तिला पापाराझींनी विचारले की, "मॅडम तुम्ही काल झालेल्या घटनेबद्दल काय म्हणाल?" यावर रीम म्हणाली की, "का? काय झाले काल?" त्यानंतर ती हसू लागली. रीम शेखच्या या उत्तराने आणि तिच्या वर्तनामुळे सर्वच आश्चर्यचकित झाले आहेत. तिचा हा व्हिडीओ सोशल मीडियावर तुफान व्हायरल होत आहे. या व्हिडीओवर नेटकऱ्यांकडून कमेंट्सचा पाऊस पडत आहे.

नेटकऱ्यांच्या कमेंट्स

रीम शेखच्या अशा वागण्यामुळे तिला ट्रोल केले जात आहे. कमेंटमध्ये एका युजरने म्हटले की, "बस इंस्टाग्राम पे पोस्ट शेअर करना आता है...कुछ बोलना नही", तर दुसऱ्या युजरने लिहिलं की, "ना इसे खाना बनाना आता हे... ना कॉमेडी और ना उसके पास दिमाग हे..." तिसऱ्या युजरने लिहिलं की, "सब पता है...बस नौटंकी करत आहे... " तर चौथ्या युजरने लिहिलं की, आपण मानवता गमावत आहोत....किसी को कोई मतलब नहीं है की हमारे देश मै क्या हो रहा है..." अशा नकारात्मक कमेंट व्हिडीओवर येत आहेत.

व्हिडीओमध्ये रीम शेखला हसताना पाहून नेटकऱ्यांना खूप राग आलेला आहे. पापाराझींनी विमान अपघाताबद्दल विचारल्यावर रीमचे शांत बसने नेटकऱ्यांना चांगलेच खटकले आहे. रीम शेखने पापाराझींच्या प्रश्नावर उत्तर जरी दिले नसेल तरी तिने इन्स्टाग्रामवर एक स्टोरी शेअर करून आपले मत मांडले आहे.