Actress : मनोरंजन विश्वातून एक दु:खद बातमी समोर आली आहे. प्रसिद्ध हॉलिवूड अभिनेत्री केली मॅक हीचे निधन झाले आहे. अवघ्या ३३ व्या वर्षी तिची प्राणज्योत मावळली. 'द वॉकिंग डेड' आणि 'शिकागो मेड' अशा शोजमध्ये काम करुन तिने प्रेक्षकांमध्ये लोकप्रियता मिळवली होती. केली मॅकच्या निधनाच्या बातमीने सिनेसृष्टीमध्ये शोककळा पसरली आहे.

२ ऑगस्ट २०२५ (शनिवारी) केली मॅकचे निधन झाले. केलीने तिच्या जन्मगावी सिनसिनाटी या ठिकाणी अखेरचा श्वास घेतला. केलीच्या निधनाची माहिती तिच्या बहिणीने सोशल मीडिया पोस्टद्वारे दिली आहे. १० जुलै १९९२ रोजी केली मॅकचा जन्म झाला होता. मागच्या महिन्यात केलीने तिचा ३३ वा वाढदिवस साजरा केला होता.

डेडलाइन वृत्तपत्राने दिलेल्या माहितीनुसार, केली मॅक ग्लिओमा आजाराने त्रासली होती. ग्लिओमा हा एका प्रकारचा ब्रेन ट्यूमर आहे. या आजारात मेंदू आणि पाठीच्या कण्यातील ग्लिअल पेशींमध्ये ट्यूमर होतो. ग्लिअर पेशी न्यूरॉन्सना आधार देतात, त्यांचे पोषण करतात आणि त्यांची काळजी घेतात.

अभिनयाशिवाय केली मॅक एक उत्कृष्ट पटकथालेखिका देखील होती. केलीने तिची आई क्रिस्टन क्लेबेनो यांच्यासोबत काम केले होते. त्यांनी एकत्रितपणे अनेक पटकथा लिहिल्या आहेत. 'ऑन द ब्लॅक' ही १९५० च्या दशकातील लोकप्रिय कथेवर त्यांनी पटकथा लिहिली होती. केलीच्या निधनानच्या बातमीने चाहत्यांना धक्का बसला आहे. सोशल मीडियावर चाहत्यांनी केलीला श्रद्धांजली वाहिली आहे.