Kajol : "आता मी हिंदीत बोलू?"; मराठीत बोलत असताना हिंदीत बोल म्हटल्यावर काजोलचा पारा चढला, पाहा VIDEO

काल (5 ऑगस्टला) 'महाराष्ट्र राज्य चित्रपट पुरस्कार' (Maharashtra State Film Awards) सोहळा मोठ्या थाटामाटात पार पडला. या सोहळ्याला मुख्यमंत्री देवेंद्र फडणवीस आणि उपमुख्यमंत्री एकनाथ शिंदे उपस्थित होते. या सोहळ्यात आजवरच्या चित्रपट कारकिर्दीत मोलाची कामगिरी केलेल्या कलाकारांना गौरवण्यात आले. बॉलिवूडची सुपरस्टार अभिनेत्री काजोलला (Kajol ) 'स्वर्गीय राज कपूर विशेष योगदान पुरस्कार 2024' प्रदान करण्यात आला आहे. तसेच बॉलिवूड अभिनेते अनुपम खेर यांना देखील 'स्वर्गीय राज कपूर जीवनगौरव पुरस्कार 2024'ने सन्मानित करण्यात आले.

'महाराष्ट्र राज्य चित्रपट पुरस्कार' सोहळ्याचे फोटो आणि व्हिडीओ सध्या सोशल मीडियावर तुफान व्हायरल होत आहे. या पुरस्कार सोहळ्यातील काजोलचा एक व्हिडीओ व्हायरल होत आहे. ज्यात तिला हिंदीत बोलायला सांगितल्यामुळे ती चिडताना दिसत आहे. नेमकं झाले काय, जाणून घेऊयात. पुरस्कार सोहळ्यानंतर काजोल मीडियाशी संवाद साधत होती. तेव्हा अचानक मराठी बोलता बोलता काजोल भडकली.

मीडियाशी बोलताना काजोल म्हणाली, "हा पुरस्कार मला वाढदिवसाच्या दिवशी मिळाला माझ्यासाठी मोठा दिवस आहे. मी खूप खुश आहे की, आज माझ्यासोबत माझी आई देखील आहे. हा पुरस्कार तिला देखील आधी भेटला होता. त्यामुळे ही माझ्यासाठी खूप गोष्ट आहे." त्यानंतर तिला एका मीडिया प्रतिनिधीने हिंदीत बोलण्यात सांगितले. तेव्हा ती खूप भडकली आणि म्हणाली की, आता मी हिंदीतून बोलू? ज्यांना समजून घ्यायचं असेल, ते समजून घेतील...(अब मैं हिंदी में बोलू? जिसको समझना है...वो समझ लेंगे)"

काजोल 'महाराष्ट्र राज्य चित्रपट पुरस्कार' सोहळ्याला खूप खास लूक करून आली होती. तिने पांढऱ्या रंगाची काळी नक्षीदार काठ असलेली साडी नेसली होती. ही साडी काजोलच्या आईची आहे. काजोलची आई देखील पुरस्कार सोहळ्याला उपस्थित होती. काजोलने पुरस्कार घेतल्यावर मराठी भाषेत आपल्या भावना व्यक्त केल्या आहेत.