अभिनेत्री जुई गडकरी ठरलं तर मग या मालिकेतून घराघरांत पोहचली आहे. मालिकेतील जुईच्या अभिनयाने प्रेक्षकांची मने जिंकली. मालिकेत जुई साकारत असलेल्या भूमिकेवर तिचे मनापासून प्रेम आहे. 'इच्छा तिथे मार्ग' या म्हणीचा अनुभव अभिनेत्री जुईने घेतला आहे.

अलिकडेच काही दिवसांपासून जुईने मालिकेतून ब्रेक घेतला होता. सोशल मीडियाद्वारे जुईने चाहत्यांना याबाबतची माहिती दिली होती. जुईने एका छोट्या अपघातामध्ये तिच्या कानाला दुखापत झाल्याचे सांगितले होते. सुरूवातीला जुईला वाटलं की हे दुखणं काही दिवसात बरं होईल पण हे दिवसेदिवस वाढतच गेलं. यानंतर जुईने डॉक्टरांकडे जाऊन तपासणी केली. यानंतर जुईच्या कानाची शस्त्रक्रिया झाली.

जुईने हा काळ तिच्यासाठी अत्यंत कठीण आणि कसोटीचा असल्याचं सांगितलं आहे. जुईने आता परत तिच्या कामाला सुरूवात केली आहे. दरम्यान मालिकेतील प्रतिमाच्या एण्ट्रीनंतर सायली आणि प्रतिमाचे अनेक भावनिक क्षण सुरू आहेत. जुईने एका इमोशनल सीनसाठी अंगाई गायली. कानाच्या पडद्याला इजा झाल्यामुळे आवाजातले चढ- उतार कळत नव्हते. मात्र मालिकेचे दिग्दर्शक सचिन गोखले आणि संपूर्ण टीमने जुईला सपोर्ट केला. आणि जुईने खूप चांगल्याप्रकारे सीन साकारला. शस्त्रक्रियेसाठी आठवडाभराची सुट्टी गरजेची होती. जुईने शूटिंग संपवून मगच शस्त्रक्रिया करण्याचा निर्णय घेतला. बाप्पाचा आशीर्वाद आणि संपूर्ण टीमच्या सहकार्यामुळेच हे मी करू शकले आहे. असं जुईने सांगितलं आहे.