Actor Struggle: तमिळ चित्रपटसृष्टीतील अभिनेता विमल सध्या सोशल मीडियावर चर्चेत आला आहे. विमलचा एक व्हिडिओ सोशल मीडियावर मोठ्या प्रमाणात व्हायरल होत आहे. या व्हिडिओमध्ये तो रस्त्याच्या कडेला इतर भाजी विक्रेत्यांसोबत बसून चक्क भाजी विकताना दिसत आहे. सुरुवातीला हा व्हिडिओ पाहून अनेकांना विमल आर्थिक अडचणीत असल्याचं वाटलं. मात्र, त्यामागचं खरं कारण समोर आल्यानंतर चाहत्यांनी त्याचं कौतुक केलं आहे.

शेतकऱ्यांच्या मदतीसाठी विकली भाजी

विमल एका चित्रपटाच्या शूटिंगसाठी तिरुचिरापल्ली जिल्ह्यातील मनाप्पराईजवळील आपल्या मूळ गावी गेला होता. यावेळी स्थानिक बाजारातून जात असताना त्याने अचानक आपली गाडी थांबवली. त्यानंतर रस्त्याच्या कडेला बसलेल्या भाजी विक्रेत्यांमध्ये तोही जाऊन बसला आणि स्वतः भाजी विकण्यास सुरुवात केली.

व्हायरल व्हिडिओमध्ये विमल भाजीचं वजन करताना आणि स्थानिक नागरिकांशी संवाद साधताना दिसत आहे. त्याचा साधेपणा पाहून अनेकजण आश्चर्यचकित झाले. विशेष म्हणजे, विमलने काही भाजी विक्रेत्यांना काही रुपये देऊन त्यांना मदतही केली. ‘रूटकास्ट’ नावाच्या इन्स्टाग्राम अकाउंटवरून हा व्हिडिओ शेअर करण्यात आला. विमलने गरजेपोटी भाजी विकली नसून, स्थानिक शेतकरी आणि विक्रेत्यांना मदत करण्यासाठी त्याने स्वेच्छेने हा उपक्रम केल्याचं सांगण्यात आलं आहे.

चेक बाऊन्स प्रकरणामुळेही चर्चेत

दरम्यान, विमल सध्या एका चेक बाऊन्स प्रकरणामुळेही चर्चेत आहे. वृत्तानुसार, चेन्नईतील न्यायालयाने ४.५ कोटी रुपयांच्या चेक बाऊन्स प्रकरणात त्याला एक वर्षाच्या तुरुंगवासाची शिक्षा सुनावली होती. हे प्रकरण त्याच्या ‘मन्नार वगैयरा’ चित्रपटाच्या निर्मितीशी संबंधित असल्याचं सांगितलं जातं. चित्रपटाच्या निर्मितीसाठी विमलने गोपी नावाच्या फायनान्सरकडून पैसे घेतले होते. मात्र, या प्रकरणात न्यायालयाने त्याच्या शिक्षेला स्थगिती देत अपील करण्यासाठी वेळ दिला आहे.

कोण आहे अभिनेता विमल?

विमल हा तमिळ अभिनेता आणि मॉडेल आहे. त्याने २००१ मध्ये आपल्या अभिनय कारकिर्दीला सुरुवात केली. २००९ मध्ये प्रदर्शित झालेल्या ‘पसांगा’ चित्रपटातून त्याला मुख्य भूमिका मिळाली. ‘केडी बिल्ला किल्लाडी रंगा’ हा त्याच्या लोकप्रिय चित्रपटांपैकी एक आहे.