Soundarya Death Controversy : अमिताभ बच्चन यांच्या सूर्यवंशम चित्रपटाचे अनेकजण चाहते आहेत. चित्रपटगृहामध्ये फ्लॉप ठरलेला हा चित्रपट टीव्हीवर सुपरहिट ठरला. सूर्यवंशममध्ये अमिताभ बच्चन हे दुहेरी भूमिकेमध्ये होते. या चित्रपटातील मुख्य नायिका सौंदर्याचा २००४ मध्ये मृत्यू झाला होता. तब्बल २२ वर्षांनी तिच्या मृत्यूबाबत खुलासा करण्यात आला आहे.

बंगळुरूमध्ये प्रचारादरम्यान विमान अपघातात सौंदर्या हिचा मृत्यू झाला. त्या वेळेस सौंदर्या गरोदर होती. दाक्षिणात्य अभिनेते आणि चित्रपट निर्माते मोहन बाबू यांनी मालमत्तेच्या वादातून सौंदर्याची हत्या केल्याचा आरोप तेलंगणामधील चिट्टीमल्लू नावाच्या एका सामाजिक कार्यकर्त्याने केला आहे. त्याने यासंदर्भात तक्रार देखील केली.

या प्रकरणावर सौंदर्याचे पती जीएस रघू यांनी भाष्य केले आहे. 'मोहन बाबू आणि सौंदर्या यांच्याबद्दलच्या खोट्या बातम्या पसरवल्या जात आहेत. या गोष्टी अफवा असून त्यांचे मी खंडन करतो. माझी दिवंगत पत्नी सौंदर्याकडून त्यांनी कोणत्याही प्रकारची मालमत्ता घेतलेली नाही', असे रघू यांनी तेलुगू ३६० ला दिलेल्या मुलाखतीमध्ये म्हटले.

'मोहन बाबू यांना आम्ही २५ वर्षांपासून ओळखतो. मी त्यांचा खूप आदर करतो, आमचे चांगले संबंध आहेत. आम्ही एका कुटुंबाप्रमाणे राहतो. मी पुन्हा एकदा स्पष्ट करतो की, मोहन बाबू सरांशी आमचा कोणताही आर्थिक व्यवहार झालेला नाही, त्यामुळे अशा खोट्या बातम्या पसरवणे बंद करा', असे वक्तव्य मोहन बाबू यांनी केले आहे.