मुंबई : मराठी सिनेसृष्टीत चित्रपट, नाटक आणि मालिकांमधून प्रेक्षकांना खळखळून हसवणारे ज्येष्ठ अभिनेते विजय कदम यांचं वयाच्या ६७ व्या वर्षी निधन झालं. मागील काही दिवसांपासून ते कर्करोग या गंभीर आजाराशी झुंज देत होते. आज शनिवारी सकाळी ज्येष्ठ अभिनेते विजय कदम यांनी जगाचा निरोप घेतला. विजय कदम यांच्या निधनाने मराठी सिनेसृष्टीवर शोककळा पसरली आहे.

दिग्गज अभिनेते विजय कदम यांच्या निधनाने सर्वांनाच धक्का बसला आहे. विजय कदम मागील दीड वर्षांपासून कर्करोगाची झुंज देते होते. त्यांच्यावर मागील काही महिन्यांपासून उपचार सुरु होते. आज शनिवारी सकाळी विजय कदम यांनी जगाचा निरोप घेतला. विजय यांच्या निधनाने त्यांच्या कुटुंबावर दु:खाचा डोंगर कोसळला आहे.

विजय यांच्या निधनाच्या वृत्ताने मनोरंजनसृष्टीत हळहळ व्यक्त करण्यात येत आहे. त्यांच्या जाण्याने हरहुन्नरी कलाकार गमावल्याची भावना व्यक्त केली जात आहे. विजय कदम यांच्या पार्थिवावर आज दुपारी दोन वाजता अंधेरी येथील स्मशानभूमीत अंत्यसंस्कार करण्यात येणार आहेत.

मराठी सिनेमातील काही भूमिका प्रचंड गाजल्या

विजय कदम यांनी मराठी सिनेमांत काम केलं आहे. त्यांनी हळद रुसली कुंकू हसलं, देखणी बायको नाम्याची, पोलीस लाईन, चष्मेबहाद्दर, सासू नंबरी जावई दस नंबरी, धुरंधर भातवडेकर या सिनेमातील त्यांच्या भूमिका प्रचंड गाजल्या. त्यांनी भिकाजीराव करोडपती, ती परत आलीये आणि शेजारी शेजारी पक्के शेजारी सारख्या मालिकेतही त्यांनी प्रेक्षकांचं निखळ मनोरंजन केलं.

विजय कदम यांनी १९८० साली छोट्या भूमिकेतून सिनेमात पदार्पण केलं. कर्करोगातं निदान झाल्यानंतर ते कित्येक वर्ष अभिनय क्षेत्रापासून दूर होते.