नोरा फतेहीच्या 'केडी - द डेव्हिल' (KD: The Devil) चित्रपटातील 'सरके चुनर तेरी सरके' (sarke Chunri Teri Sarke) गाण्याने सोशल मीडियावर धुमाकूळ घातला आहे. या गाण्यावर कायदेशीर कारवाई करण्यात आली आहे. या गाण्यावर सोमवारपासून सोशल मीडियावर तीव्र टीका होत आहेत.या गाण्यात अश्लील शब्द तसेच अश्लील डान्स स्टेप्स पाहायला मिळत आहेत. नेटकरी या गाण्याला अश्लील म्हणत आहेत. बॉलिवूड अभिनेत्री कंगना रणौतने देखील यावर टीका केली आहे.

'सरके चुनर तेरी सरके' गाण्याचे संगीत दिग्दर्शक अर्जुन जान्या आहेत. गीत रकीब आलम यांनी लिहिले आहे आणि हे गाणे गायक मंगली यांनी गायले आहे. अशात गाण्याच्या हिंदी आवृत्ती करणारे गीतकार रकीब आलम यांनी आता या वादग्रस्त ओळी आपण लिहिल्या नसल्याचे स्पष्ट केले आहे. TOI रिपोर्टनुसार, त्यांनी 'HT City' ला सांगितले, "हे बोल मी लिहिलेले नाहीत; ते चित्रपटाचे दिग्दर्शक 'प्रेम' यांनी कन्नड भाषेत लिहिले होते. जेव्हा मला हे सर्व लिहिण्यास सांगण्यात आले, तेव्हा मी नकार दिला होता. मी त्यांना सांगितले होते की, अशा प्रकारची गाणी चालणार नाहीत आणि ती सेन्सॉरच्या कात्रीतही अडकतील. तेव्हा त्यांनी मला फक्त कन्नड आवृत्तीचे शब्दशः भाषांतर करून देण्यास सांगितले आणि ते गाण्याच्या तालात (meter) बसवण्याचे काम ते स्वतः करतील असे सांगितले. 'Choosega' (चोखणे), 'chaatega' (चाटणे) यांसारखे शब्द मूळ कन्नड आवृत्तीमध्येच आहेत."

रकीब आलम पुढे म्हणाले की, "हे गाणे अगदी शेवटी स्पष्ट करते की, हे संपूर्ण गाणे दारूच्या बाटलीबद्दल आहे. पण त्याआधीचे सर्व काही अत्यंत अश्लील आणि घाणेरडे आहे. मी याला नकार दिला होता. मला अशा प्रकारची गाणी लिहिण्याची काय गरज आहे? जेव्हा मी चांगली गाणी लिहितो, तेव्हा लोकांचे त्याकडे लक्ष जात नाही. राम चरणच्या आगामी 'Peddi' या चित्रपटासाठी मी हिंदीमध्ये 'Chikri Chikri' हे गाणे लिहिले आहे. 'Pushpa' चित्रपटातील हिंदी गाणीही मीच लिहिली होती. 'सरके चुनर तेरी सरके' या गाण्यामुळे मला स्वतःलाच अपमानित झाल्यासारखे वाटत आहे."

आलमने पुढे असेही सांगितले की, ही समस्या सोडवण्यासाठी टीमने पुन्हा एकदा त्याच्याशी संपर्क साधला होता. "त्यांनी मला सोमवारी रात्री फोन केला आणि 'स्वच्छ' (आक्षेपार्हरहित) शब्दांसह गाण्याची एक नवीन आवृत्ती लिहिण्याची विनंती केली. मी मंगळवारी सकाळी ती त्यांना पाठवली आणि त्याच दिवशी तिचे रेकॉर्डिंगही सुरू झाले. मंगळवारी संध्याकाळी, एका माफीनाम्यासह हे गाणे प्रदर्शित करण्याची त्यांची योजना आहे..."