बॉलिवूडचा नवाब सैफ अली खान सध्या त्याच्या 'कर्तव्य' चित्रपटामुळे चांगलाच चर्चेत आहे. 'कर्तव्य' मध्ये सैफ अली खान पोलीसांच्या भूमिकेत दिसत आहेत. या चित्रपटात अभिनेता युधवीर अहलावत झळकला. त्याने चित्रपटात 'हरपाल' हे पात्र साकारले जे किशोरवयीन मुलाचे आहे. अनेकांना हा युधवीर अहलावत खऱ्या आयुष्यातही लहान किशोरवयीन मुलगा वाटला, मात्र तसेच नसून तो ३३ वर्षांचा पुरुष आहे. अभिनेता सैफ अली खान देखील युधवीरला सुरूवातीला लहान मुलगा समजला होता.

'कडक' (Kadak) ला दिलेल्या मुलाखतीत युधवीर म्हणाला की, मला खूपच छान वाटतंय. लोकांना माझं काम आवडलं आहे, असे मेसेजेस ते मला पाठवत आहेत. मी याच दिवसाची वाट पाहत होतो. मी सतत प्रत्येकाच्या मेसेजेसना (DMs) उत्तर देत आहे.रेड चिलीजसोबत काम करण्याची ही माझी दुसरी वेळ आहे आणि अनुभव खूपच छान होता. मुकेश छाब्रा यांच्या टीमकडून मला फोन आला की ते 'कर्तव्य' नावाच्या चित्रपटासाठी कास्टिंग करत आहेत आणि त्यांना 'हरपाल'च्या भूमिकेसाठी माझी ऑडिशन घ्यायची आहे. मी ऑडिशन दिली आणि एक-दोन टेक्सनंतर त्यांनी मला सांगितले की, मी चांगली कामगिरी केली आहे. कुठेतरी मलाही वाटले होते की हा चित्रपट मीच करेन. एका आठवड्यानंतर, मला रेड चिलीजकडून फोन आला आणि त्यांनी सांगितले की या भूमिकेसाठी माझी निवड झाली आहे."

अभिनेता पुढे म्हणाला की, "मी तरुण दिसतो म्हणून माझे कौतुक व्हायचे, विशेषता महिला चाहत्यांकडून... ती लोक मला क्यूट बोलायचे. एका मुलाखतीत सैफ सरांना चित्रपटातील त्यांच्या आवडत्या दृश्याबद्दल विचारण्यात आले होते. त्यांनी माझे कौतुक करताना म्हटले, 'हरपाल खूप छान काम करतो. मी त्याच्यासोबत १६ वर्षांचा मुलगा समजून वागायचो. पण मग पुलकित सरांनी (दिग्दर्शक) सांगितले की मी प्रत्यक्षात ३३ वर्षांचा आहे. हे ऐकून त्यांना धक्काच बसला.' ती क्लिप खूप व्हायरल झाली होती..."

शेवटी युधवीर म्हणाला की, "सुरुवातीला सगळे माझ्याशी एखाद्या बालकलाकारासारखेच वागायचे. नंतर पुलकित सरांनी सर्वांना सांगितले की मी प्रत्यक्षात ३३ वर्षांचा आहे. त्यानंतर संजय मिश्रा सर आणि इतर लोकांनी माझ्याशी एखाद्या प्रौढ कलाकाराप्रमाणे वागायला सुरुवात केली..." युधवीर अहलावतच्या अभिनयाला प्रेक्षकांकडून खूपच चांगला प्रतिसाद मिळत आहे.